uMthunywa
Nxa kuhlatshiwe ekhaya isibindi siyananzelelwa ngoba silenyongo engatheleka yonke inyama yonakale ize ilahlwe ingadliwa. Kanti-ke isibindi esithengwa esilahweni (butchery) asiselayo inyongo sesiliqatha nje. Nanzelela ukuthi isibindi siyathandwa yibo bonke abantu. Sidliwa kakhulu ngezikhathi zokudla kwekuseni loba okwamadilini.
Siyathandeka isibindi njalo simnandi nxa sizuze osipheke kuhle njengoba ngizalandisa lapha lamuhla. Konke ukudla kuya ngompheki wakhona. Bathi nxa uthe wadla isibindi ubutshada buyaphela. Kuyini ubutshada? Yikukhanuka inyama uze uyomele uqotho sibili. Isibindi lesi silendlela ezinengi zokusipheka.
Okhokho babesosa emalahleni omlilo wenkuni besithi hwaqahwaqa sisale silokhu sibuthakathaka sivuza igazana kancane. Lawe ungenza njalo ubone ukuthi ngumahluko bani ozawuzwa nxa ususidla. Into nje yikuthi nxa sithe saphekwa kubi ungeke waphinda usidle empilweni yakho. Kanti nxa siphekwe kuhle langayiphi indlela usala ulokhu usidla uze uphose uncitshe isiphofu.
Lamuhla ngizakutsho indlela eyodwa yokupheka isibindi ngizayitsho yona langebizo. Wena nxa usazi ezinye bona ukuthi uzipheka kuhle.
Ukukhanzinga isibindi
Okudingekayo.
1. Isibindi esibuthakathaka esilingana abazakudla
2. Amafutha okupheka, isawudo, ibilebile le-pepper
3. Ipani yokukhanzingela kumbe udengezi.
4. Ingqamu, ifulawa elingeneyo, ifologwe, uphini letshukela.
Indlela yokukhanzinga
1. Thatha iqatha lonke ulesule ngelembu elimhlophe elilunama ungagezisi ngamanzi.
2. Hluba uqweqwe olulula olusigoqeleyo olusajwabu.
3. Siqobe sibe ngamaqatshana alingeneyo.
4. Khathesi yesula iqatha ngalinye ngalinye ngelembu elimhlophe elihlanzekileyo njalo lilunama hatshi limanzi.
5. Thela ifulawa encinyane sibile emganwini ochayekileyo.
6. Vuvuzela isawudo le-pepper lebilebile.
7. Giqagiqa amaqatha ngalinye ngalinye kufulawa enlutshwana emganwini omkhulu.
8. Thela amafutha epaneni angabi manengi
9. Beka ipani emlilweni uyekele amafutha atshise, nxa esetshisa faka amaqatha epanini ukhanzinge.
10. Phenduphendula ubone ukuthi akutshi njalo akuvuthwa kuqine.
11. Bona njalo ukuthi umlilo ulingene, kungathatha imizuzu engu 6 ukukhanzinga.
12. Dlana lesinkwa kumbe dlana sisodwa nje uzikholisele isibindi.
