uMthunywa
Ethel Ncube loThando Dube
KULENDODA yesiqintini seMadlelenyoni eNtabazinduna esele ibonga amadlozi akwabo ngemva kokudibana losathane ngokwakhe omane wayigaxisa inyoka entanyeni andubana athi bayebulala esinye isihlobo sakhe esiseduze.
Indoda le uGift Banda isatshaqekile lalamhlanje ngesehlakalo lesi esimtshiye eyisimungulu okwensuku ezinhlanu ngapho evuvuke okwendlovu nanko phela walwisana lenyoka le eyayisimnamathele okwamahola phose amathathu.
Kuzwakale ukuthi uMnu Banda inyoka le wayibulala waphinda wayithwala ngemva kokulaywa yindoda eyayibonwa nguye yedwa.
Ekhuluma loMthunywa uNkosazana Meliwe Moyo uveze ukuthi isiga lesi sibatshiye betheneke amadolo njengesigaba.
“Thina sezwa ngomsindo emadabukakusa umfana ehlaba umkhosi onzima elwisana lebululu elifileyo kodwa limnamathele lingafuni ukwehlukana laye.
“Mina ngibona angathi lababantu bayazana khonale labomakhelwane babo ngoba omunye wathi sekwenzakele lokho wahle wagada ibhasi waya edolobheni,” kutsho uNkszn Moyo.
Uqhubekele phambili echaza ukuthi kulomuntu olesandla esigabeni lesi, akukodwa lokhu.
“Umfana lo ngesikhathi elwisana lenyoka le, wahamba wayahlaba umkhosi komunye umuzi, ugogo wakhona kazange aphume phandle. Lokhu lakho kulenkulumo phakathi,” kutsho uNkszn Moyo.
Iphephandaba likazulu liphinde laxhumana lomama wale indoda oziveze ngokuthi nguMaNdlovu kuphela oveze ukuthi ubengathembi ukuthi umntanakhe uzaphila.
“Umfana wami wabuya kithi engakhangeleki evuvukile njalo engasakhulumi esethule eseyisimungulu, lokhu kwangiqeda amandla ukuthi kungabe sekutheni?
“Ubabakazi nguye owasizayo kakhulu ukuthi ehlukane lenyoka le ngoba uthi yayisala ukwehlukana laye kodwa yona ivele ikhanya ukuthi ifile. Ngemva kokwehlukana lenyoka wayevele engasezwa endlebeni njalo engasakhulumi,” kutsho uNkszn Ndlovu.
UMthunywa uzwe ukuthi inyoka le yayimele yethuse usibale kalundoda owayeyithwele ukuze afe. Ekhuluma lentatheli uMnumzana Ozious Hadebe onguye okwakumele abone linyoka ahle afe khonapho ngokwethuka uchaze ukuba kalankani ngesiga lesi.
“Lokhu kuyangiqeda amandla sibili ukuthi lumfana wabuya lenyoka kimi ebanga umsindo lami ngehluleka ukuyibona kodwa eyithwele entanyeni. Kwavuka ubabakazi wakhe, nguye owangitshela ukuthi kangiboni ukuthi umuntu lo ulwisana lenyoka mina ngangingayiboni.
“Uthe esesithi kwakumele ngife ngemva kokubona inyoka le kwangethusa kakhulu ngoba kangikwazi ukuthi kwakumele ngifelani,” kutsho uMnu Hadebe.
UMthunywa wenelisile ukukhulumisana loGift Banda onguye owabulala inyoka waphinda wayithwala oveze ukuthi yena ibululu leli kalithwalanga yedwa, kulomuntu ayehamba laye ebonwa nguye yedwa lanxa wayehamba labanye abangane bakhe abathathu.
“Mina ngayibulala ngayitshiya ngathi ngiphenduka ngabona umuntu eceleni kwami owabonwa yimi ngedwa abanye engangilabo bengamboni wathi ngiyithathe ngiyeyipha uHadebe. Wangiqhuba ngaze ngayafika kobabakazi ngithe ngifika wathi ngingene endlini ngehluleka ngoba kulegodi phambi kwami. Ngithe sengehlulekile ukungena “lowomuntu” wangena phakathi kwegodi wahle wangicatshela. Ngasala ngingasazi ukuthi ngenzeni ukuthi ngabe aluba ngangena egodini ngangisifa okungadingwayo.
“Lowomuntu esenyamalele ngasala ngilwisana lenyoka le eyayisinamathele entanyeni yami. Ukuthi kwahamba njani ukuze ngehlukane layo angazi kodwa ngahlala amalanga ngingenelisi ukukhuluma,” kuphetha uMnu Banda.
