uMthunywa
Msilisi Dube
INKAMPANI ekhangele ngezenhlanyelo eyeSeedco ikhuthaza abalimi ukuba bathenge inhlanyelo emankampanini aqondileyo ukwenzela ukuthi bathole isivuno abayabe besikhangelele.
Kubikwa esikhathini esinengi abalimi bavame ukuthenga inhlanyelo engamiliyo okucina kubangela ukuba badlalise imali yabo belokhe bethenga inhlanyelo kokuphela.
Ekhuluma loMthunywa uMnumzana Wilberforce Ncube osebenza kulinkampani uthe sekulabantu abagangileyo abathengisa inhlanyelo ezingamiliyo njengendlela yokuqila abalimi.
“Sesithole imibiko eminengi yokuthi sekulabantu abathengisa inhlanyelo ezingamiliyo. Abantu laba bayathatha umumbu esiphaleni bawugcobe ipenda qede lapho bathengisele abalimi.
“Ngomnyaka ophelileyo abalimi abanengi abalima ingqoloyi bathengiselwa inhlanyelo yesilimo lesi engamiliyo. Inhlanyelo le iyabe isidlulelwe yisikhathi umlimi yena athatheke athenge ngoba itshiphile,” kuchaza uMnu Ncube.
UMnu Ncube uqhubekele phambili wathi abalimi akumelanga bethatheke ludumo lokutshipha kwenhlanyelo.
“Ngithanda ukukhuthaza abalimi ukuba bekele ukuthathekiswa yikutshipha kwenhlanyelo abangene ezitolo bathenge inhlanyelo eqondileyo.
“Njengoba khathesi isikhathi sokulinywa kwengqoloyi sesifikile umlimi kumele abone ukuba uyathenga inhlanyelo ezamila imlethele inzuzo ethile hatshi ukuthenga inhlanyelo efileyo.
“Ukuthenga inhlanyelo emankampanini aqondileyo kuqondile ngoba inhlanyelo yakhona iyabe ifakwe imithi evikela izibungu ukuba zingayihlaseli njalo iyamila ngoba ihlolwe ngobuciko obuphezulu,” kuphetha uMnu Ncube
