uMthunywa
Musa Janga lo Edson Khumalo
KULEMULI yeGokwe elokhu ikhakhamele ngesehlakalo esiyehlele ngeviki ephelileyo lapho ithe ngemva kokubeka elinye ilunga layo ngelanga elilandelayo yathola engcwabeni sokuphenduke kwaba yinkalakatha yesiduli.
Imuli yakoEdson Shoko ehlala elayinini kasobhuku Gumburimete indawo engaphansi kwenduna uChiya Chireya ilokhu izidla izibindi ngesimanga lesi esenzakale kuviki ephelileyo.
UMthunywa uzwe ukuba abantu esiqintini bamangala bebona abakoShoko bengcwaba omunye wabo beyisithupha nje kungela ngitsho loyedwa ovela phandle.
Ngemva kokungcwaba isihlobo sabo lesi bebodwa ngelanga elilandelayo bathi bevuka ekuseni besiyakhangela ingcwaba bathola sokuvele inkalakatha yesiduli phezu kwalo okwenza bangaphozisi amaseko bahle bayabikela induna.
Lindaba ibikelwe induna uChiya Chireya kuviki ephelileyo yena olandisele intatheli ka Mthunywa ngokwenzakalayo.
“Imuli le yabhujelwa yisihlobo sayo okungasatholakalanga ibizo laso kuthe kunjalo yangcwaba iyodwa. Benza umkhuba bayathatha ihlahla emasimini balibeka phezu kwengcwaba. Kuthe ngelanga elilandelayo ekuseni bathola lelihlahla seliphenduke laba yisiduli,” kutsho induna uChireya.
Uqhubeke phambili esithi lindaba khona izahlalelwa phansi ngeSonto kuyimuli kanye labakhulu besigabeni ukuze kuxazululwe lolu daba kuhle.
“Bathi lokhu kuyabahlupha kungakho-ke badinga ingcazelo yokuthi kuyini okwabangela ukuthi ihlahla elaliphezu kwengcwaba liphenduke libe yisiduli,” kuphetha induna uChireya.
