uMthunywa
Cornelius Luphahla
IZAKHAMIZI zesigabeni seMafa eLupane sezisungule iphurojekithi yesivande semibhida ngenhloso yokuzithuthukisa kanye lokuthuthukisa isigaba.
Iphurojekithi le ebizwa ngokuthi yiSizambijana isungulwe ngabesifazana abayisithupha abangaphansi kukaSobhuku uBikita Ncube.
UMthunywa uvakatshele kule indawo wakhulumisana lelinye ilunga uNkosazana Sakhiso Ndebele uchaze ukuthi okwabenza baqala iphurojekithi le yikuthi babe lenzuzo ukuze bazithuthukise.
“Iphurojekithi le siyisungule singabesifazana ngenjongo yokuthola inzuzo ukuze senelise ukuziphilisa kanye lokuthuthukisa isigaba sethu,” kuchaza uNkszn Ndebele.
Esinye isakhamuzi esikule iphurojekithi uNkosazana Belter Ndlovu ubikele intatheli ukuthi esivandeni sabo balima imibhida lezinye izilimo.
“Esivandeni sethu silima imibhida, amatamatisi kanye lehanyanisi njalo izilimo lezi sizithengisela izakhamizi ngakho sikhangelele ukuthuthukisa isivande sethu ngoba sesiqalile lokulima umumbu.
“Sikhangelele njalo ukuthi nxa izilimo lezi sezizinengi sizithengisele ezikolweni kanye lezitholo ze St Luke’s,” kutsho uNkszn Ndlovu.
UNkosikazi Listen Ndlovu uveze njalo ukuba amanzi okuthelela lezizilimo bawathatha emgodini.
“Amanzi okuthelela siwathatha emgodini manje uhlupho olukhona yikuthi akhatshana okudala ukuthi kube nzima kithi ukuthelela lezizilimo,” kuchaza uNkoszn Ndlovu.
Umgcinisihlalo walesisivande uNkszn Silibaziso Ncube uchaze ukuthi uhlupho abahlangana lalo yibudli obudla izilimo zabo.
“Uhlupho esilalo kulesisivande yikuthi inkawu ziyadla izilimo zethu sesize sibephela izinja ukuze zesabe ukungena.
Okunye njalo yikuthi asila cingo ngakho sizama ukuthenga ucingo ukuze sivikele izilimo zethu emagundwaneni la njengoba ecatsha ethangweni,” kuphetha uNkszn Ncube.
