uMthunywa
Ethel Ncube
KULEMULI yeNyathi ekhonona ngamadokotela kanye labongikazi besibhedlela seMpilo esikoBulawayo kulandela ukuphambanisa ukwelapha elinye ilunga lemuli yalo okulakho ukubangela ubugoga enyaweni, uMthunywa uyakuveza lokhu.
UMnumzana Khawulani Mpofu owadutshulwa ngenyanga ephelileyo ezingela okungekho emthethweni eNyathi usefuthelwa okuphindiweyo ngemva kokuba omongikazi benze iphutha ekufakeni insimbi zokuqondisa unyawo osekubangele ukuthi izilonda zicine ziphihlika.
Intatheli ixhumane lelinye ilunga lemuli yakoMpofu elizichaze ngokuthi nguMnumzana Mandla Ncube eliveze ukungasuthiseki ngokwelatshwa kwesihlobo salo.
“Mina angikwazi ukuthi omongikazi laba basebenza njani, abazidubi ngitsho kancane ngempilo zabantu. Saletha umfowethu ukuthi azothola usizo esibhedlela sebefika bengezelela ubuhlungu abuzwayo yena evele efuthelwa,” kutsho uMnu Ncube.
Uqhubekele phambili eveza ukuthi kakuzwisisi ukuthi kuhamba njani ekwelatshweni kukaMpofu.
“Mina ngavela ngabona ukuthi kukhona okunuka santungwana kulesisibhedlela ngoba ngesikhathi elethwa lapha wayelohlamvu lombhobho enyaweni ahlala lalo amalanga ambalwa lungakakhitshwa yena esizwa ubuhlungu.
“Ngangihlala ngisiyambona ngimbuza ukuthi kanti unyawo lwaba lamathuthuva amilayo ngawani wathi yena kuyazenzela kwaqhela kwaze kwacina unyawo soluphihlika izilonda.
“Ngithe ngifika ngempelaviki wathi usister-in-charge ufike wathi insimbi zokudonsa unyawo kazifakwanga kuhle yikho sesiba lezilonda ezimilayo,” kuchaza uMnu Ncube.
Uqhubekele phambili wathi okwamzwisa ubuhlungu yikuthi omongikazi laba kabazange bazihluphe ngitsho ngokuxolisa.
“Ngazibuza imibuzo engapheliyo ukuthi iphutha leli balenze ngabomo omongikazi kumbe hatshi ngoba phela labodokotela bayabhoda nsukuzonke pho kungani bebengakuboni lokhu?
“Ngempela ugatsha lwezempilakahle kumele luyehlola indlela izisebenzi zesibhedlela lesi ezisebenza ngayo ngoba khathesi uMpofu ugcwele izilonda enyaweni okungenzeka acine equnywa lonyawo,” kutsho uMnu Ncube.
UMthunywa wethekelele esibhedlela seMpilo wakhulumisana loMnu Mpofu onguye owelatshwayo.
“Ngahlala amalanga athize insimbi le ebotshelwe enyaweni lwami lasembhedeni ingafakwanga ngendlela eqondileyo lami ngenxa yokungazi ngahlala injalo ngabona sekumila amathuthuva acina esiba yizilonda. “Kwathi ngelinye ilanga usister-in-charge ebhoda ekhangela izigulane wafika wangitshela ukuthi insimbi le eqondisa unyawo iyangilimaza, ayifakwanga ngendlela eqondileyo yikho unyawo solulezilonda. Watshela omongikazi bayilungisa.
“Sengifuthelwa ngamanxeba amanengi okudutshulwa lawokwenziwa ngomongikazi. Indlela omongi laba abasebenza ngayo iyadanisa ngoba kabenzi abakutshelwa ngodokotela ngesikhathi ngitsho,” kulandisa uMnu Mpofu.
Wengezelele wathi khathesi kulensimbi osokulesikhathi udokotela wathi ifakwe elokhu ingakafakwa.
Intatheli ixhumane lo-Acting Clinical Director weMpilo uDokotela Solwayo Ngwenya olanduleyo ukuthi kulesigulane esingelatshwanga kuhle.
“Lokho ayisiyo ndaba emangalisayo njalo akusikho ukuthi omongikazi abamnaki. Akulanto enjalo umuntu lowo elithi walinyazwa yizisindo (weights) ayisikho, wazivuvukela yedwa waba lezilonda njalo akukho okubhaliweyo encwadini yakhe yesibhedlela ukuthi insimbi zokumqondisa inyawo zazingabekwanga ngendlela efaneleyo, kwakumele kubhalwe,” kutsho uMnu Ngwenya.
Ebuzwa yintatheli uMnu Ngwenya ukuthi kungani uMnu Mpofu elokhe engafakwanga insimbi encedisayo enyaweni uchaze ukuthi ayikho.
“Insimbi le efunekayo kayikho esibhedlela yilo uhlupho esilalo, ingatholakala uzafakwa ayisikho ukuthi omongikazi kabafuni ukumfaka,” kuphetha uMnu Ngwenya.
