uMthunywa
Arnold Ndlovu
ILANGA lamhlaka 16 Mbimbitho lilanga elizahlala likhunjulwa ngabalandeli bembube ngoba iqembu leMpumelelo Shining Stars ebeselileminyaka engu-17 lisenza izimanga likhethe ukuguqula ibizo lalo kanye lokunyathela ngonyawo olutsha.
Emcimbini obuseHope Centre koBulawayo iqembu leli libikele amanye amaqembu kanye labalandeli balo ukuthi selibizwa ngokuthi yi-Indosakusa “The Morning Star”.
Ekhuluma emcimbini lo, uOscar Siziba ongomkhulu weqembu leli uthe abalandeli bomculo wabo balindele ukukhula kweqembu labo ngemva kokuguquka abakwenzileyo.
“Abalandeli bomculo wethu kabalindele uluju kuphela ngoba sizaqhubekela phambili sihlabela imbube njengakudala esikutshintshileyo libizo nje kuphela.
“Ukutshintsha ibizo esikwenzileyo singathi yisibonakaliso esisiphiwe ngophezulu. UMdali ophezulu watshintsha uSawuli wabizwa ngelithi Pawule, lakithi kunjalo, ngemva kokukhuleka uNkulunkulu wasivezela ukuthi kumele sitshintshe ngoba sesizakwenza umsebenzi omkhulu,” kutsho uOscar emcimbini lo.
Uqhubekele phambili wathi imbali yeMpumelelo Shining Stars abasoze bayilahle.
“Ibizo selitshintshiwe kodwa imbali yeMpumelelo Shining Stars ngeke siyilahle, sizayigcina, abafuna amadlalade eqembu akudala bazawathola. Lonyaka sesimelele ukukhipha idlalade lethu lakuqala njengeNdosakusa,” kuveza uSiziba.
Iqembu leli lasungulwa ngomnyaka ka2001 eGwanda eMapane, njalo selivakatshele amazwe atshiyeneyo kusizwekazi seAfrica agoqela iSouth Africa, Botswana, Malawi, Zambia, Swaziland kanye lamanye betshumayela ngomculo wembube.
