INKUKHU ZIPHAPHELA PHEZULU. . . iChicken Inn ithola usizo lwemali

INKUKHU ZIPHAPHELA PHEZULU. . . iChicken Inn ithola usizo lwemali

0 166

Nkosilathi Sibanda
ABADLALI beqembu elidlala kuligi yeCastle Lager ele-Chicken Inn sebethole usekelo lwemali ephezulu kwe$230 000.

Amankampani amane abalisa iBon Vie Medical Aid Scheme, iBlack Shark Protection Services, Zibuko Capital leNational Foods asephithizela ukusekela leliqembu.

Kube ngumthimba ngoLwesithathu ekuseni lapho amankampani la ethule khona usekelo kuqembu lama-Gamecocks. Inkampani yezempilakahle iBon Vie Medical Aid Scheme ihambe phambili kwezinye ngokuzinikela ukunceda abadlali labaqeqetshi nge-medical aid ebiza i$233 986 ngesizini.

Ngokwakuqala kumbali yenguqu yePSL ukuthi kube leqembu elidonsa usekelo kumankampani amane ngasikhathi sinye.

Amaqembu alosekelo lwaphezulu iHighlanders leDynamos awakaze abhuzelwe ngamankampani ngalindlela.

Isikhulumi seBon Vie Medical Aid uThembie Mloyi-Ncube uthe bayajabula ngokusondela eduzane leChicken Inn.

“Njengenkampani enkulu, silokuthaba ukubambana leqembu elikhulu eliphumelela njengeChicken Inn. Sizanikeza iqembu leli i-medical aid kubadlali lakubaqeqetshi. Phezulu kwalokhu abadlali bazaphiwa izikipa zokugqoka nxa belolonga. Usekelo lwethu lukhulu, lubiza imali engange-$233 986.”

Inkampani yeBlack Shark Protection Services ibike ukuba izakwehlukana le$35 700 kulisizini incedisa iChicken Inn.

“Ngenxa yokuba ukuphumelela kusegazini leChicken Inn, bekungela eyinye indlela ngaphandle kokuthi inkampani yethu yeBlack Shark Protection Services ibe yingxenye yalileqembu,” kutsho umaqhuzu uTrevor Jakachira.

Umaqhuzu lo uthe bazanikeza isipho se$650 kumdlali owenze kuhle ngemva kwenyanga.

“IBlack Shark Protection Services yiyo ezakwenza umthimba wokubonga abadlali ngemva kwesizini.”

Izikhulu zeChicken Inn zithe amanye amankampani asezalandela ezogcwalisa isithembiso sokusekela iqembu.

IZibuko Capital ebona ngezomnotho wemali ithembise ukunika isipho kumdlali ozenza kuhle ekupheleni kwazo zonke inyanga kanye lokuthengela iqembu impahla.

Umaqhuzu wePSL uKennedy Ndebele ukhuthaze iChicken Inn ukuthi ibize abalandeli abanengi.

“Iqembu lenu alila balandeli abanengi ngakho ngilikhuthaza ukuba lenze umsebenzi wokudonsa abantu eqenjini.

“Lokho kuzancedisa ukuthi lamankampani afuna ukulisekela abone ukuthi iChicken Inn liqembu elilebizo.”

AmaGamecocks asedlale imidlalo engu-234 kuligi yeCastle Lager njalo asenqobe kumidlalo engu-106.

UAntipas uxoxe loMthunywa kuliviki waveza ukuthi abasoke badanise. Uthe uzitshaya isifuba ngokudlala okwenziwa ngabadlali bakhe.

“Okwenziwa liqembu ngokubambana lamankampani kuyasikhuthaza ukuthi siqhubeke sidlala kuhle.”

SIMILAR ARTICLES

NO COMMENTS

Leave a Reply