uMthunywa
NguMsilisi Dube
UGATSHA lweDepartment of Irrigation solukhuthaze abalimi ukuba basebenzise indlela yokulima ebizwa ngokuthi yi-micro elevated jet system ngoba ilula njalo izilimo zakhona zikhula kuhle.
Ekhuluma lentatheli kaMthunywa uMnumzana Benjamin Mangwiro oyisisebenzi senhlanganiso le, uthe indlela le yokulima iqakathekile kakhulu ngoba kayisebenzisi kakhulu njalo ikhipha izilimo ezilohlonzi.
Kubikwa nxa umlimi esebenzisa indlela le uqala ngokuhlanyela intanga zakhe emagabheni abizwa ngokuthi ngama-trays, okwamaviki ayisithupha ngaphambi kokuba zikhitshwe zifakwe enhlabathini.
“Ukulima nge-micro elevated jet system kuqakathekile kakhulu ngoba akusebenzisi kakhulu nxa sesikuqathanisa lezinye inhlelo zokulima njalo izilimo zakhona zilohlonzi,” kutsho uMnu Mangwiro.
Uqhubekele phambili wathi nxa umlimi esebenzisa uhlelo lolu amanzi awadlaliseki njalo intanga nxa zisese nhlabathini zingakamili kazifi.
“Izilimo lezi zithelelwa ngamanzi alingeneyo angafani lamanzi ezulu, lokhu kwenziwa ngokusebenzisa impompi ezingenisa amanzi.
“Kwesinye isikhathi izulu liyabulala intanga kumbe inhlanyelo ngoba nxa lisina lifika litshaye ngamandla ngakho indlela le yokulima iqondile ezilimweni ezilinywa ngentanga kumbe ngenhlanyelo,” kutsho uMnu Mangwiro.
UMnu Mangwiro uphinde wathi izilimo ezilinywe ngalindlela azihlaselwa lula yimikhuhlane.
“Izilimo ezinjengombhida lamatammatisi nxa zahlanyelwa ngalindlela azihlaselwa lula yimikhuhlane,” kutsho uMnu Mangwiro.
Uphethe ngokuthi uhlelo lolu luyaphathisa abalimi abalima izilimo ezinjengamatamatisi angafuni ukulinywa ngesikhathi somqando.
“Izilimo ezinjengamatamatisi ezingavumiyo ukulinywa ngesikhathi somqando ziyalimeka ngendlela le ngakho abalimi kumele bakhuthalele ukulima ngalindlela,” kuphetha uMnu Mangwiro.
