uMthunywa
Nkosilodumo Ndebele
INGXENYE yokuqala yesizini ka2018 isifikile kodwa lokhe bexakekile abantu ngokuthi kanti vele lona liyinyamazana bani iqembu elitsha iBulawayo Chiefs.
Abanye sebelifanise loDavida wasebhayibhilini kepha ngoba selinqobe oGoliyathi beligi abathathu.
Otsheketsha bobabili, iFC Platinum le Ngezi Platinum besebengoGoliyathi kulisizini, bengakaze banqotshwe empini, kodwa uDavida, iBulawayo Chiefs iyisebenzisile irekeni ukuwatshaya amakhanda afa lawamabhawu.
I-FC Platinum yiyo eyaqala ukunqontshwa 2-0 emavikini amane adluleyo, kwalandela iNgezi yadliwa 1-0 ngeviki elandelayo kwacina ngeqembu elikhulu iHighlanders ngempelasonto yeviki eyalandelayo .
Ayevele etshilo Amakhosi amahle ukuthi abazanga kuzogcwalisa inani lamaqembu kuligi kodwa bazokulwa okwesikhukhukazi sivikela amatsiyane ekhozini.
“Bengasidelela bethi sibatsha sizaba liqembu elilula ukunqoba kodwa sizabatshengisa ukuthi lathi njengabo, singamasotsha size empini,” kutsho umphathi weqembu uDumisani Mantula.
Uphinde wathi inkinga abadibane layo kula amalanga yikuthi abagadli babo abathathu balimele.
“Salahlekelwa ngabadlali bethu abathathu emdlalweni edluleyo. Phakathi kwabo ngumkhokheli wabo Chaminuka Kundishora ongasoze enelise ukudlala isizini ize iphele,” utsho eqhubeka uMantula.
“Kungakho sizabe sidinga abadlali bokuthi beqinise iqembu ngesikhathi esiyathatha khona ikhefu lesizini ngoba sivunyelwe ukuthenga abadlali.”
Loba nje sebedle oGoliyathi bathe abasoze bathathele amanye amaqembu abazadlala lawo phansi. Bazawathatha njengawo wonke amasotsha empini.
Sesilindele imidlalo elandelayo eyengxenye yesibili yesizini, kasisoze siwathathele phansi amanye amaqembu esizadlala lawo.
Osokudidanise abantu amakhanda yikuthi nxa lidibana lamanye amaqembu amancinyane bayayinqoba iBulawayo Chiefs.
Umdlalo wabo wokucina bedlala leqembu leZPC Kariba banqotshwa osokutshiye abalandeli baleliqembu bedidane ingqondo ukuthi kuyini okubehlula ukudla amaqembu amancinyane kodwa benelise ukudla amaqembu amakhulu kuligi.
“Akulaqembu elikhulu loba elincinyane kuligi. Wonke amaqembu aze ukuzonqoba. Engingakutsho nje yikuthi amalanga kawafani, kwezinye insuku siyanqoba, kwezinye siyanqotshwa kodwa akulaqembu esilithathela phansi kuligi,” kutsho uMantula.
