uMthunywa
Msilisi Dube
IQEMBU labahlabeleli abadumileyo abeGoli eleBig Nuz lithi lizimisele ukusebenza labahlabeleli bakuleli abeMagesh-Tornadoes ukuze bathuthukise umculo kunye lomgido wabo.
Iqembu leMagesh liqembu labasakhulayo njalo abalesifiso sokusa phambili imisebenzi yabo yokugida ikakhulu bengathola usekelo lwemali.
Ekhuluma loMthunywa ngoMgqibelo umhlabeleli weBig Nuz uMandla Maphumulo odume ngokuthi nguMaMpintsha uthe uzimisele ukuncedisa abasakhulayo laba ukuze bafeze iphupho labo.
“Sinanzelele ukuba abasakhulayo laba balesifiso sokugida okuzwayo. Indlela abagida ngayo iyathathekisa kakhulu ngakho sizazama ngazo zonke indlela ukuba sibancedise ngendingeko zabo umnyaka ungakapheli. Sifisa ukuncedisa iqembu leli ngoba likhanya lisebenza gadalala.
“Indlela abagida ngayo iyatshengisa ukuba bazimisele sibili. Okubangele ukuba sikhethe abasakhulayo laba phakathi kwamanye amaqembu abegida lapha yikuthi indlela abagida ngayo yehluke kakhulu kulamanye amaqembu,” kuchaza uMaMpintsha.
UMaMpintsha uqhubekele phambili wathi abahlabeleli kumbe abagidi kumele bagide ngendlela ezitshiyeneyo ukuze bakhange abalandeli.
“Akumnandi ukubona abagidi begida ngendlela efanayo kokuphela. Kumele batshintshe indlela abagida ngayo ukuze bakhange ababukeli babo,” kuphetha uMaMpintsha.
I-Big Nuz ngelinye lamaqembu elilabalandeli abanengi kuleli kodwa ngosuku abaqhunse ngalo bekulabalandeli abalutshwana.
Abalandeli beqembu leli abangayanga egigini le bathe sekunzima ukulandela abahlabeleli beGoli ngoba behlukumeza inzalo yakuleli.
“Kunzima ukusekela abahlabeleli beGoli izihlobo zethu zihlukunyezwa kunye lokubulawa khonangale. Nxa sihamba emagigini abo kutsho ukuthi siyabe sibasekela ukuba behlukumeze abanye bethu. Yikho ngibone kungcono ukuba ngingahambi ngenxa yaleso sizatho,” kuchaza uMgcini Nyoni ohlala
eGwabalanda.
