uMthunywa
Major Vunguza Mlotshwa
Sithanda ukubonga sitshayela uMongameli welizwe ihlombe ngokubisela uJonathan N Moyo emsebenzini kaHulumende kukanti thina besimlahlile ekhethweni oludlulileyo ngomnyaka ka2013 ngoNtulikazi. Ngithanda njalo ukulimukisa uzulu wakithi eTsholotsho aqaphele avule amehlo akhangelisise kulolukhetho esiya kulo.
Bantu bakithi abahloniphekayo ngiyalicela liphakame ngobunengi benu liyevotela intuthuko ingqubekela phambili inhlalakahle ngokufaka uSikhwicamfundo uJonathan N. Moyo webandla elibusayo eleZanu-PF.
Asivoteleni uJonathan Moyo. Asiyekeleni ukuba siphika ngalabo abazimele bodwa ngoba badinga ukuthi sibavotele ngemva kwalokho bakhohlwe ngathi bayezidlela imali kaHulumende wethu bodwa.
Abangeke basincede ngalutho. Abaziwa njalo abalambali eyaziwayo. USikhwicamfundo uMoyo uzimisele ukuletha inhlelo ezinengi zempumelelo eTsholotsho ezigabeni zonke. Sikhuluma ngomuntu olezinto ezibambekayo azenzileyo njalo usemsebenzini kalambanga lamhlanje iTsholotsho ilamaHigh Schools ngenxa yakhe. I-Tsholotsho ibibizwa ngokuthi ngumnyama ubambile kodwa okaMoyo ukwesulile konke lokhu. Lamhlanje sileTsholotsho ekhanyayo.
Ama-tower lights silawo eTsholotsho nguJonathan Moyo. Ukuthi itarred road ingafakwa eTsholotsho sikuboniswe nguMoyo. Sike saba lendlala uMoyo wathumela amabele ayethengiswa ngentengo ephansi. Abantu baphila eTsholotsho. UMoyo wancedisa ezikolo zePrimary le-secondary iTsholotsho yonke. USikhwicamfundo ngumuntu wakuqala kusukela ngo1980 ukuzimisela ukunakekela abantu bakibo eTsholotsho. Nxa sifuna intuthuko kusobala ukuthi kumele simelwe ngumuntu onjengoMoyo.
Asazi engxenye ngemva kweminyaka ethize angaba khona ofana laye kodwa iqiniso akekho. Zinengi izinto azenzileyo ngingeke ngizibalise ngiziqede. Singachithi isikhathi sethu sivotela abantu abaphikisana loHulumende bazaluthatha ngaphi uncedo bona bephikisana loHulumende.
Bantu bakithi abahloniphekayo thathani lelithuba lisuse ubuyanga eTsholotsho lifake intuthuko ngokuvotela uMoyo. Into engijabulisayo yikuthi izinduna labosobhuku balubonile usizo lukaMoyo. Ngike ngaxoxisana labanye abagoqela induna uSiphoso, Gilbert Dumane, uJ V Dube, uP Dube, uT Bengwane, uGladys Ngwenya uJuly Maphosa, uJoseph Zondo phansi khonale kuWard 7.
Ngenxa kaJonathan Moyo sizakhohlwa zonke indubo zethu ebesilazo. Bantu bakithi uJonathan Moyo ulothando lokusinceda njalo ulozwelo kafuni abantu besigaba sakibo bahlupheke. Yikho uMongomeli welizwe wamthatha wamnika umsebenzi omkhulu kangaka thina simlahlile manje yisikhathi sethu sokuqondisa amaphutha ethu.
Qinani bantu beTsholotsho North, lifake umuntu olithandayo, olinakekelayo njalo olozwelo. Omela izikhalazo zenu njalo afeke izifiso zenu. Yekelani ukuvotela abantu abaphikisa uHulumende esigabeni senu seTsholotsho North.
Phambili leTsholotsho. Libe lokuvota okuhle mhlaka 10 Nhlangula 2015.
NguMajor Vunguza Mlotshwa, Ward
