uMthunywa
Charity Moyo
ABALIMI sebekhuthazwe ukuthi baqalise ukulungisa amasimu abo kunye lokubiya ukuze nxa izulu lisewula libathole sebelungele ukulima.
Ngokwenzenje abalimi bazasizakala kakhulu ukuze bengabi lomsebenzi omnengi ngesikhathi izulu lisina kodwa bedobhe amakhuba bayefaka inhlanyelo phansi.
UNkosikazi Treggy Mpofu onguAgritex Extension Officer kunhlanganiso yezokulima uthe kubalulekile ukuthi abalimi baqalise khathesi amalungiselelo okulima omnyaka ka2015/2016 ngoba lokhu kuzabaphathisa kusivuno abazasithola.
Uthe ukulungiselela ukulima khathesi kuzaphathisa njalo ukuthi bangachithi isikhathi nxa izulu selisina.
Uqhubekele phambili esithi abalimi botshinda kumele beqalise ukugamula izihlahla ukuze bezitshise ngesikhathi esifaneleyo. Uthe isizatho sokuthi bazitshise ngesikhathi lesi yikuthi umoya uyabe umnengi ngakho kuzancedisa ukuthi zitshe ngokuphangisa.
Uveze ukuthi abalimi abalimela ukudla labo kumele baphatheke kakhulu ngalesi isikhathi ngoba umumo womkhathi usuguqukile ngakho kubanzima ukwazi ukuthi izulu lizakuna ngayiphi inyanga njengoba lilakho ukuphangisa kumbe ukuphuza.
Ekhuluma ngodaba lwenhlanyelo uveze ukuthi abalimi kumele bahlele njalo bathenge khathesi inhlanyelo abafuna ukuyihlanyela intengo zingakakhweli.
“Kubalulekile ukuthi umlimi athenge inhlanyelo afuna ukuyilima ngesikhathi lesi ngoba ngokuya kwesikhathi intengo ziyaqansa.
“Okunye njalo umumo womkhathi usuguqukile, ngakho kuhle ukuthi umlimi ahlale elungele konke okungenzeka,” kutsho uNkszn Mpofu.
UNkszn Mpofu ukhuthaze abalimi bonke ukuthi baphatheke ekulimeni njengoba inengi labantu lithola ukudla kanye lemali engabancedisa kikho.
Uthe abalimi abangatholanga inzuzo lonyaka bangalahli ithemba ngoba kungenzakala kusikhathi esizayo sokulima batshaye inala.
“Abalimi bangalahli imbeleko ngokufelwa ngoba lonyaka izilimo kazivuthwanga kuhle, iminyaka kayifanani.
Kungenzeka ukubana izulu line kuhle abantu batshaye inala esabekayo,” kuphetha uNkszn Mpofu.
