uMthunywa
Samkelo Tshuma loMsilisi Dube
SEBEHLEZI bephethe izibindi ngezandla abantu beHope Fontain bucwadlana ledolobho lakoBulawayo nanko phela kubikwa kuletshabhini ekule indawo lapho abantu abalwa khona bacine sebebulalana.
Izakhamizi zakulindawo zithi zifuna itshabhini yakoGringo ivalwe ngoba sebebanengi abantu ababulawa phakathi kobusuku bevela khona.
Kubikwa kusukela nyakenye kuzofika khathesi sokulabantu abahlanu asebefile ngemva kokuhlahlelwa ngamahloka.
Okuyikho osokusenza izakhamizi zakule indawo zifune ukuthi itshabhini le ivalwe yisehlakalo esenzakale kuviki ephelileyo ngoLwesine lapho okulendoda ehlahlelwe ngehloka ekhanda njalo isesimeni esibi esibhedlela seMpilo.
Esinye isakhamuzi esithande ukwaziwa ngokuthi nguJoel nje kuphela sibikele uMthunywa ukuba abanye babantu abafayo bayabe bexabene kubangwa utshwala, kwezinye izikhathi kubangwa omahotsha.
“Otsheketsha banengi kule indawo njalo bangahlangana kucina kubangwa utshwala kunye labomahotsha abayabe belanda ukuzakokotsha etshabhini le,” kutsho uJoel.
Uqhubekele phambili wathi udlakela olwenzakala etshabhini le solusenza abantu besabe ukuhambela duzane lendawo le.
“Ukufa kwabantu bevela etshabhini le sokusitshayisa ngovalo. Nyakenye umnyaka usiyaphela kwafa omunye umbalisi ovezwe ngokuthi nguKhumalo nje kuphela owahlahlelwa ephuma kulitshabhini.
“Khathesi kulojaha oganyulwe ngoLwesine kuviki ephelileyo obangwa lezibi ngenxa yokudakwa okwedlulisileyo okwenzakala lapha,” kutsho Joel.
Ezinye izakhamizi zithe sezizame ukukhulumisana labakhokheli besigaba ukuba ivalwe kodwa kuyehlula.
UMnumzana Ncube ohlala kulindawo uthe sebekhathele ngokucela abakhokheli besigaba ukuthi bavale itshabhini le ngoba izigigaba ezenzakalayo sezizinengi.
“Lokhe kwafika uGringo kule indawo asilakuthula ngenxa yokulwa okuba khona mihla lamalanga etshabhini yakhe.
“Abantu bayagamulana kukanti abantwana labo kabasayi ezikolo ngenxa yokukokotsha khona,” kulandisa uMnu Ncube.
Esinye njalo isakhamuzi esingathandanga ukuziveza ibizo ngenxa yokwesaba ukuxotshwa esigabeni sigcizelele ngodaba lukatsheketsha oganyulwe kulitshabhini.
“Ngeviki ephelileyo kulomunye utsheketsha owaziwa ngokuthi nguThokozani Sibanda oganyulwe enatha utshwala ngikhuluma nje usesibhedlela seMpilo. Sesazama ukuxoxisana labalisa bakulumango kodwa abafuni kusincedisa.
“Okusizwisa ubuhlungu yikuthi etshabhini le kuthengiswa izidakamizwa eziyizo ezenza abantwabethu bengasayi esikolo. Sazama ukukhuluma lokhansila kodwa udaba lwakhona lwaphelela emoyeni,” kuchaza lumfakazi.
UMthunywa uzame ukuxhumana lomlisa walindawo uMnumzana Siphambaniso Ncube wala ukuveza ngokwenzakala esigabeni sakhe ethi iphephandaba leli kumele likhulume losobhuku.
“Angeke ngikhulume ngokwenzakala emangweni wami. Umuntu okumele akutshele kuhle ngusobhuku. Mina bengingakezwa lutho olunjalo kodwa ngiyakwazi ukuthi kulombalisi owafayo nyakenye,” kuchaza uMnu Ncube.
Inombolo zikasobhuku bezingangeni.
