uMthunywa
Ethel Ncube
BATHABE bamanzi te abalimi bakuleli kulandela ukuphuma kwembiko yokuthi bazaphiwa imitshina yokulima kanye lamathalakitha.
Kubikwa imitshina le evela elizweni leBrazil izaphiwa abalimi kuzabelo zonke zelizwe.
Kuzwakale ukuthi abalimi bazabolekwa imali (loans) yokuthenga imitshina le njalo bazayibhadala ebhanga le Agribank okweminyaka engu-15.
Kukhangelelwe ukuthi abalimi bazabhadala isikwelede lesi kanye ngomnyaka ngemva kokuthengisa isivuno sabo.
Abakhangele ngokwabikwa komhlaba kanye lababona ngezokulima bazabhoda izabelo eziyisificaminwemibili befundisa abalimi ngokutshayela kanye lokunakekela amathalakitha.
Imitshina le ikhangelele ukuphiwa abalimi abalima bethelezela, abakuma A1, kanye labalimela ukuthengisa.
UMnumzana Abdul Nyathi ongomunye wabakhokheli beZimbabwe Farmers Union uveze ukuthi kuzakhethwa ngamawadi abalimi lama- irrigation asebenzayo.
“Abalimi abazatholiswa imitshina yokulima bayabe bekhangelelwe ukuthi babe belima amahekitha alitshumi kusiya phezulu, kungakho labo abalendawo ezincane balakho ukuthi babambanise amasimu abo ukuze labo bathole imitshina yokulima,” kulandisa uMnu Nyathi.
UMthunywa uxhumane lomunye wabalimi beLupane uMnumzana Delumusa Ndlovu yena oveze ukuthi bayaluthakazelela loluhlelo ngoba amathalakitha azabanceda ukuphendula endaweni yakibo.
“Ngiyajabula ngalokhu uHulumende aseveze ukuthi ufuna ukusenzela khona ngoba kithi kulesidaka kungakho sicina siqhatsha amathalakitha sibhadala imali engange$150 insimu encane okwenza abanye abalimi bacine bengasalimi esidakeni ngoba bengelayo imali le.
“Kungakho-ke nxa singaphiwa amathalakitha kutsho ukuthi lonyaka sizazitshayela inala ngoba phela esidakeni kulokudla,” kuphetha uMnu Ndlovu.
