uMthunywa
Buhlebenkosi Gaule
KULENDODA yePumula South koBulawayo emiswe phambi komthethwandaba isetheswa icala lokutshaya lokubulala enye njalo indoda kubangwa isepa yokugeza izandla kwenye itshabhini ekulelilokitshi.
UKhumbula Ndlovu umiswe phambi kukamantshi weTredgold uMnumzana Manasa Musiwa ngoMvulo kuyonale iviki.
Kuvele ukuba mhlaka 7 Nkwenkwenzi lonyaka umsolwa ohlala ku14179 ePumula South wayenatha utshwala etshabhini kaSikhalwesihle Dube ekulelilokitshi. Kubikwa wayenatha lomuyi uDecent Nyathi labanye nje abantu ababekhona.
Esipha ubufakazi ngalelicala uDube uthe wananzelela ukuba isepa ayeyifake endlini encane ukuze abantu bageze izandla ngemva kokusebenzisa lindlu yayisinyamalele ngokunjalo wabuza abantu ababesetshabhini ukuba ngubani oyithetheyo kodwa kulamuntu owavumayo.
Umtshutshisi walelicala uOtuwell Mudyazvavanhu uthe Umsolwa lalo osengumuyi bathe sebephandle ngemva kwesikhatshana baqala ukuphikisana ngendaba yokutshontshwa kwesepa yetshabhini umsolwa wahle weqela uNyathi wazithela izibhakela phezu kwakhe.
Uthe Umsolwa watshaya uNyathi waze wawela phansi kodwa waphikelela ngokumtshaya waze waqala ukuhlanza.
“Umsolwa lalo osengumuyi baqala ukuphikisana ngendaba yesepa yetshabhini eyayisinyamalele sebephandle okwabangela ukuthi umsolwa eqele uNyathi ngezibhakela wamtshaya waze wawela phansi.
“Uthe esewele phansi usolwa kazange amzwele kumbe amekele waphikelela ezithela izibhakela uNyathi waze waqala ukuhlanza. Uthe eseqale ukuhlanza umsolwa wayikho enanzelela ukuthi angabe esemlimaze kakhulu kungakho-ke wasukuma wazihambela,” kutsho uMudyazvavanhu.
Umsolwa wasuka wazihambela watshiya uNyathi ebubula ebhuqwini.
Amapholisa adingisisa ngaloludaba athi kucatshangelwa ukuba uNyathi wavuka ngemva kwesikhathi watotoba wayafika endlini lapho ahlala khona wafika wakhumula impahla zonke ezazigcwele igazi walala.
Ekuseni abantu bevuka sokumhlaka 8 Nkwenkwenzi kubikwa umuyi kabonakalanga esenza ajayele ukukwenza njengenhlalayenza okwenza ukuthi abantu bamqoqodele kodwa akazange avule umnyango njalo wawuhluthulelwe.
Ngokunanzelela ukuthi kungabe kulento engayisisyo abantu babiza amapholisa okwenza isivalo sikamuyi sivulwe andubana bafumane isidumbu sakhe.
Umsolwa uthe esizwa ukuba udingwa ngapholisa ngodaba oluphathelane lokubulawa kukaNyathi, wakubona kungcono ukuthi azibulale kulokuthi aye entolongweni kungakho-ke wanatha umuthi wamagundwane kodwa watholakala engakafi wagijinyiselwa esibhedlela seMpilo.
UMudyazvavanhu ucele inkundla ukuba inganiki umsolwa ibheyili ngoba amapholisa kawalaso isiqiniseko sokuba uNdlovu uzalimela icala lakhe njengoba eseke wazama ukuzibulala phezu kwalokhu uthe esinye isizatho ngesokuthi izihlobo zikamuyi zizonde zigane unwabu ngokufa kwelunga lemuli yazo okungenza zimlande zimenze okubi okungenza icala lingabe lisathethwa ngendlela efaneleyo.
Umantshi uphethe ngokuthi icala leli ledluliselwe phambili kumhlaka 20 Nkwenkwezi.
