uMthunywa
Johas moyo
ABENHLANGANISO yeAgritex esabelweni seMatebeleland North bakhuthaza abalimi bonke ukuthi bangaphenduli amasimu ngoba kuphambanisa isimo somhlabathi.
UMnumzana Davison Masendeke ongu Chief Agronomist kuAgritex esabelweni seMatabeleland North ukhuthaze abalimi ukuthi bananzelele ubungozi obukhona ekhuphenduleni umhlabathi yiloba kuphathisa kwelinye icele.
Uthe inengi labalimi seliqalisile ukuphendula amasimu okuyinto engakhuthazwayo ngabezokulima ngoba kululaza isimo somhlabathi.
“Sikhuthaza abalimi ukuthi bangaphenduli umhlabathi ngoba kuletha ububi obunengi kulobuhle esimweni somhlabathi.
Yebo ukuphendula kuyenza amanzi angene phansi njalo kwenza umhlabathi wenelise ukubamba amanzi, ukumbokotha inkotha kanye lamahlanga kuvundisa umhlabathi kwenze kube lomquba emasini kodwa ngakwelinye icele kuletha uhlupho kubalimi,” kutsho uMnu Masendeke.
Uqhubekele phambili wathi abalimi abananzeleli umonakalo ongabakhona uma bangaphendula umhlabathi ngoba lokhu kubangela ukugugudeka komhlabathi njalo kubulala isimo sawo (soil structure).
“Sixwayisa abalimi ukuthi bengaphenduli amasimu ngoba kwenza umhlabathi ugugudeke lula, njalo kubulala isimo sawo.
Lokhu kubangela ukuthi umlimi angabe esaba lesivuno esihle ngemva kokulima ngoba umhlabathi usuyehlile uma kusiza kusimo sawo njalo omunye umhlabathi uyabe usugugudekile okungakuhle kubalimi.
“Kuqakathekile ukuthi abalimi badinge abalimi abangabaphathisa uma kuyikuthi bafuna ukuphendula umhlabathi kumbe ukwenza yiloba yini emasimini ngoba lokhu kuzabaphathisa kakhulukazi ekuthini babengabalimi abaphumelelayo.
Kungakho-ke thina njengenhlanganiso sikhuthaza abalimi ukuthi bangawuphenduli umhlabathi ngoba lokhu kubulala umhlabathi wabo,” kutsho uMnu Masendeke.
