uMthunywa
Johas Moyo
ABENHLANGANISO yeZim Plough Trading Limited esabelweni sakoBulawayo sebakhuthaza abalimi bonke ukuthi basebenzise amakhuba akulezinsuku njengendlela yokulungiselela ukulima kwalonyaka.
Ukusebenzisa amakhuba akulezinsuku kungaphathisa abalimi ngoba kuquma isikhathi umlimi asithatha esemasimini njalo enza umsebenzi wokulima ubelula.
UMthokozisi Nxumalo osebenzela linkampani ukhuthaze abalimi bonke jikelele ukuthi bangene kuhlelo lokusebenzisa amakhuba omhlobo omutsha ukwenzela ukuthi bathuthukise indlela abalima ngayo kanye lokuthola isivuno esihle njengoba umhlabathi lokuvunda kwayo kutshiyene.
“Sithanda ukukhuthaza abalimi ukuthi basebenzise amakhuba ahambisana lomhlabathi wabo. Kulezinsuku kulamakhuba amahle kubalimi alondoloza amanzi njalo angagugudekisi umhlabathi.
“Kulezinsuku kulekhuba okuthiwa yiRipper Plough, Direct Seeder Ripper ehlanyela igqibela kanye le Dead Feeder ehlanyela ilendawo yokuthontisela ifethilayiza njalo ihlanyele iphinde igqibele okwenza ukulima kubelula njalo kuphe abalimi isivuno esihle”, kutsho uMnu Nxumalo.
Uqhubekele phambili njalo wathi abalimi kabangahlaleli izandla kabadinge amakhuba okulima zonke izilimo okuzabapha imali ikakhulu abalima ngamathalakitha labo kulamakhuba amancane angaduliyo angabasiza ekulimeni.
Sikhuthaza abalimi njalo ukuthi bathenge amarigger okwenza kubelula kibo nxa belima amagwili ngoba irigger iyahlanyela, iyavuna njalo lokho kwenza umsebenzi womlimi ubelula. Akasenzi msebenzi onzima okufana lokugebha ngepiki lefotsholo,” kutsho uMnu Nxumalo
UMnu Nxumalo uphethe ngokuthi abalimi bangathola usizo ngamakhuba abangawasebenzisa kubalimisi beAgritex.
