uMthunywa
YiNtatheli kaMthunywa
KULENYANGA edabuka eMalawi ezitshaya isifuba ngokuthi isiqale ibhizimusi yokuvusa abantu abafileyo emathuneni nanko phela ithi iyenelisa ukwenza lokhu ngemali engange $250 kuphela. Inyanga le iveze ukuba iyenelisa ukuvusa abantu abangakedlulisi amalanga amathathu befile.
Inyanga le eziveze ngokuthi inguDokotela Kalongo nje kuphela ithi isebenza lezinye inyanga njalo okwamanje seyavusa izidumbu ezinhlanu.
UMthunywa uxhumane lenyanga le yachaza ngokugcweleyo ukuba ukuvusa izidumbu kungumsebenzi olula kakhulu odinga ukukholwa nje kuphela.
“Mina ngilamandla amakhulu kakhulu. Umuntu angafa njengalamuhla ngiyenelisa ukumvusa kungakedluli amalanga amathathu. Kungedlula amalanga la kuyabe sekunzima ukuba avuke.
“Sengabavusa abanengi bengakangcwatshwa kukanti abanye ngabavusa sebeke bangena kubomaqandisa bemotsha akusinto enzima kimi lokhu ngoba ngisebenzisa imimoya elamandla kakhulu,” kuchaza uDkt Kalongo.
Inyanga le ibuye yaveza ukuba yona ibona umuntu ovuswe kwabafileyo efana nje lomuntu obelele.
“Lo engiyabe ngimvuse kwabafileyo nxa ephaphama uyabe engazi ukuthi ubefile uyabe ezibona engani ubelele.
“Kungakho-ke kuqakathekile ukuthi abakwabo bangaqali ukukhuluma ngokuthi ubefile,” kutsho uDkt Kalongo.
Inyanga le ibuye yanxusa lintatheli ukuba nxa ifuna ukubona isimanga lesi sisenzakala kayibuye lebizo likayiloba wuphi umufi eHarare.
“Wena nxa ulemali leyo gada ubuye eHarare ubuye lebizo lakhe kunye leminyaka yakhe yokuzalwa lomfanekiso wakhe ngizasivusa isidumbu umangale.
“Nxa usugadile ibhasi ususiza eHarare ungisendele umlayezo kuphela. Ungafika ngizakunika amanzi alemithi.
Okwakho yikufika ufafaza isidumbu ngamanzi engiyabe ngikunike wona uzabona evuka ngemva kwamahola amathathu kusiya kwamane,” kuphetha uDkt Kalongo.
UMthunywa ubuye waxhumana lenye njalo inyanga uDokotela Kola yaveza ukuba layo ilamandla okuvusa abafileyo lanxa sebeke bangcwatshwa.
“Ukungcwatshwa komuntu ofileyo akutsho lutho kimi. Ngilakho ukumvusa avuke khwatshu.
“Nxa abantu bengcwaba izihlobo ziyabe zingcwaba umzimba kodwa umoya wakhe uyabe uyabe uzula yikho izihlobo zakhe ziyabe zisenelisa ukumthuma kumbe ukumenza lokhu abayabe bekufuna,” kutsho ludokotela.
Elinye ilunga leZinatha uMnumzana David Mhabhinyane Ngwenya uthe lokhu akungeke kwenzakale nje ngoba nxa umuntu angafa umoya wakhe uyasuka emzimbeni wakhe undize emoyeni.
“Umoya womuntu ofileyo uyabe ubhoda emoyeni aze ayengcwatshwa ngakho akusikho qiniso elipheleleyo ukuthi singathi umuntu uyenelisa ukuvusa abantu kwabafileyo ngoba akulula ukuvusa umuntu kwabafileyo.
“Ngimdala nginje angikaze ngizwe ngenyanga eyenelisa ukuvusa abantu kwabafileyo ngiyaqala,” kutsho uMnu Ngwenya.
UDokotela Everisto Nhende ongumedical doctor uthe ukuvusa umuntu kwabafileyo yinto engeke yenzakala.
“Umuntu angafa ngemva kwemizuzu emithathu ingqondo yakhe iyama ukusebenza kungakho ukuthi umuntu uyenelisa ukuvusa umuntu ngemva kwamalanga amathathu efile ngeke kuze kwenzakale,” kutsho uDkt Nhende.
