uMthunywa
Thando Dube
INHLANGANISO ekhangele ngezokulima ikhuthaza abalimi ukuthi balime imiqwente ngoba ilenzuzo.
Ekhuluma lentatheli kaMthunywa, uNkosazana Treggie Mpofu ongu-Horticulture Specialist esabelweni sakoBulawayo uthe imiqwente yisilimo esilimekayo elizweni leZimbabwe njalo esilenzuzo.
“Imiqwente ngumhlobo wemibhida olimeka kalula iloba ngubani angayilima esivandeni kumbe ensimini athole inzuzo kusiya ngesilinganiso sendawo alime kuyo.
“Ubuhle balesisilimo yikuthi nxa silinywe ngendlela eqondileyo umlimi uyathola isivuno esihle ngemva kwenyanga ezimbili lengxenye,” kutsho uNkszn Mpofu.
UNksn Mpofu uveze ukuthi ngomumo womkhathi weZimbabwe umlimi uyenelisa ukulima imiqwente lakuloba yisiphi isikhathi somnyaka ivume.
“Umlimi ofisa ukulima imiqwente angalima kuloba yisiphi isikhathi somnyaka ngoba umumo womkhathi wakithi, imiqwente iyavuma njalo umlimi uyayithola inzunzo.”
UNkszn Mpofu uqhubekele phambili esithi ukuze umlimi athole isivuno esihle kumele alime emhlabathini olula ukuze isilimo lesi sikhule kuhle.
“Njengesilimo esikhula ngaphansi komhlabathi, imiqwente ivuma emhlabathini olula njalo olimekileyo. Umhlabathi olula njalo olimekileyo uyasivumela isilimo lesi ukuthi sikhule kuhle singafubi. Imiqwente ayidli ezikhwameni ngoba ayidingi mvundiso kanye lokufakwa imithi, okuqakathekileyo yikuthi isilimo sithole amanzi zikhathi zonke,” kugcizelela uNkszn Mpofu.
UNkszn Mpofu uphinde wathi ngaphandle kokulimeka kuhle, imiqwente ilomkambo omuhle njalo umlimi olima lesi isilimo akasweli abathengi.
“Umkambo wemiqwente ukhona kuzozonke indawo zelizwe ngoba kungumhlobo wemibhida othakazelelwa ngabantu abanengi. Uyathengiswa emikambo kanye lasezitolo ezinkulu zelizwe ngakho umlimi olima lesi isilimo ayayithola inzuzo,” kuphetha uNkszn Mpofu.
