uMthunywa
YiNtatheli kaMthunywa
NGOMVULO bekulabantu abazinkulungwane eProvincial Heroes’ Acre eNkulumane koBulawayo besiyahlonipha amaqhawe afela isizwe ukuze sithole inkululeko.
Abantu baqale ukufika kusempondo zankomo. Umcimbi uvulwe ngamachacho avela kuZimbabwe Prisons and Correctional Services (ZPCS) lavela kuZimbabwe National Army (ZNA) njalo yibo akade bekhokhela umphakathi ekuhlabeleni ingoma yesizwe.
UKhomuredi Nomthandazo Eunice Moyo onguMinister of State for Provincial Affairs koBulawayo nguye owethule umbiko wamaqhawe ovela kuMongameli welizwe uKhomuredi Mugabe.
UKhmrd Moyo ufake amaluba phezulu kwethuna lelinye iqhawe elingazange lazakale ukuthi lingubani. Ekwenza lokhu ubencediswa nguCommander weZNA 1 Infratry Brigade, uBrigadier-General Augustine Chipwere. Imuli zamaqhawe lamaqhawekazi ziphiwe lazo ithuba lokuthi zifake amaluba phezu kwamathuna ezihlobo zazo.
Izihlobo zamaqhawe zibonge uHulumende ngokuqakathekisa izihlobo zabo.
“Siyabonga umsebenzi omuhle esiwenzelwa nguHulumende ukuthi uqakathekisa izihlobo zethu ezafela ilizwe leZimbabwe.
“Siyakwazi ukuthi abamhlophe abathakazeleli ukuthi sathola inkululeko esiyikholisayo lamuhla yikho baze basifakela imithetho yokuthi singabi lobudlelwano lamanye amazwe kodwa sizaqhubeka sisivikela isizwe sakithi ukuthi bangaze basithathela njalo,” kuchaza uKhomuredi Charles Kumusoro olonina owaba ngowokuqala ukuthi abekwe emathuneni amaqhawe ngo1995.
Kulamaqhawe angu-778 lamaqhawekazi angu- 33 angcwatshwe endaweni yokubeka amaqhawe koBulawayo.
Umcimbi lo ubufakwa intshukutshu ngamaqula eZPCS le ZNA abegiya ethokozisa abantu ngokucula kanye lokugida.
Amanye amaqembu akade ethokozisa abantu yiThandanani le-Imbube Choral groups.
Abameli bePhalamende bakoBulawayo labo bebethe gwaqa kulo umcimbi bekhumbula amaqhawe.
Esabelweni seMatabeleland South abantu bebekhumbula amaqhawe, baqala umcimbi ekuseni njalo bekulamaqembu okuthokozisa abantu avela eGwanda.
IZNA brass band iyenze izimanga khonale eGwanda umphakathi wasala umangele.
Phezu kwakho konke iBlanket Mine ekaBen Arinoti layo ijabulisa uzulu okwedlula amanye wonke amaqembu akade ekhona.
Ngezikhathi zemini uKhomuredi Abedinico Ncube onguMinister of Rural Development, Promotion and Preservation of National Culture and Heritage ehamba lezinduna. Ekufikeni kwakhe uKhomuredi Ncube wethula umbiko wamaqhawe ovela kuMongameli wakuleli uKhmrd RG Mugabe.
UKhmrd Ncube wafaka amaluba ethuneni leqhawe elingaziwayo ibizo lalo ngemva kokwenza lokho wahamba wayabona amanye amathuna amaqhawe lapho afika khona wachitha isikhathi lemuli zamaqhawe atshonayo eziduduza. Uphinde njalo wafaka amaluba phezu kwethuna likankosikazi wakhe uKhomuredi Tracey Ncube.
ELupane lakho bekulomdlalo ofanayo. UKhomuredi Cain Mathema onguMinister of State for Provincial Affairs ubalele abantu umbiko ovele kuMongameli eSomhlolo Stadium. Ukhulume njalo ngokwakha okwenziwa nguMongameli eShangani lapho okwakhiwa khona idamu. Ukwakhiwa kwedamu lokhu kwenziwa kuhloswe ukuthi kuqedwe zonke inhlupho zamanzi ezihlupha abantu bakule indawo.
IZNA yiyo njalo akade ithokozisa abantu kule indawo kukhunjulwa amaqhawe.
