uMthunywa
YiNtatheli kaMthunywa
ZIDIDEKILE izakhamizi zeRedwood Block D eNyamandlovu ngemva kokuba usobhuku wabo ezihilele ngemva kokukhonjwa ngobukhunkuli.
Usobhuku lo, okutholakale ukuthi nguMaNgwenya nje kuphela kubikwa uzibophele ngeviki ephelileyo ngemva kokutshelwa ukuthi ungumthakathi ngo-tsikamutanda okubikwa ukuthi bebevela eGoli .
UMthunywa uzwe ukuthi otsikamutanda laba baveza ukuthi uMaNgwenya nguye obangela inhlupho zonke ezibhekane lemuli yakhe phakathi komphakathi okuyikho okwabangela ukuthi azibophele.
Esinye isakhamuzi sakule indawo esikhulume loMthunywa uNkosazana Rachel Ndlovu uthe kalankani ngamanga abotsikamutanda laba.
“Kangilankani ngesiga esisenzelwe ngabafana laba esigabeni abasukele uMaNgwenya bamtshela ukuthi ungumthakathi emphakathini okubelihlazo elikhulu kakhulu. UMaNgwenya wathi ezama ukuba azigeze bathi uqamba amanga. Lokhu uMaNgwenya akumphathanga mhlawumbe yikho wazibophela ngoba eswele oma laye emulini.
“Okunye okusizwisa ubuhlungu njengabomakhelwane yikuthi omunye wabo-tsikamutanda laba ngumntaka dadewabo. Ngenxa yalokhu kasiselaqiniso lokuthi umfana lo ubekhuluma iqiniso kumbe ubeqamba amanga njengoba esedale udwetshu phakathi kwamalunga emuli,” kulandisa uNkszn Ndlovu.
UKhansila kaWadi 9 uNkosazana Sibongile Mnkandla ebuzwa ngalindaba uvumile ukuthi kulosobhuku ozibopheleyo ngemva kokuba etshelwe ukuthi uyaloya.
“UMaNgwenya obengusobhuku lapha endaweni yami utshelwe ukuthi uyaloya ngabafana abasuka eGoli bezithi ngotsikamutanda,” kutsho uKhansila Mnkandla.
Kusenjalo kulosobhuku weMasuswini eLupane ogamule inkunzi kamakhelwane wakhe kuviki ephelileyo okudale ukuthi ahlawuliswe inkomo ezimbili.
Usobhuku uJabulani Nkala ugamule inkunzi kaMnumzana Elphas Mnkandla wayiquma umsipha wonyawo wasehlawuliswa inkomo ezimbili ngusobhuku omkhulu uMnumzana Mncedisi Khumalo.
Kuzwakale ukuthi inkunzi kaMnu Mnkandla ibisihlala emizini yabantu njalo ibahlaba nxa bethwele amanzi ibulale imigqomo okuyikho okwenze uNkala wayigamula.
UMthunywa uxhumane loMnu Nkala wathi okwenza wayigamula yikuthi yayiphunzisa inkomo zakhe njalo ihlaba abantu kodwa uzwa ubuhlungu ngoba kasayiphiwanga ngemva kokuhlawuliswa.
“Inkunzi kaMnkandla yayisithwalise nzima abantwabami kanye lomkami ibahlaba nxa bethwele amanzi bawachithe kwesinye isikhathi kufe lemigqomo. Okunye njalo inkunzi le yayisiphunzisa inkomo zami, ngikhuluma nje kwaphunza ezintathu kodwa umnikazi ngangimtshela engayithathi, asazi ukuthi wayeyekelelani.
“Okungizwisa ubuhlungu yikuthi kosobhuku omkhulu bangihlawulise amathokazi amabili babuya bathi uMnkandla athathe inkunzi yakhe khona bekufanele bayiphe mina,” kuchaza uMnu Nkala.
UMnu Mnkandla uthe yena ucatshulwa yikuthi inkunzi yakhe kayiselancedo sokufanele ayithengise ngenxa kaNkala.
“Mina okungicaphulayo yikuthi inkunzi yami khathesi kayiselancedo kimi ngoba kayisenelisi ngitsho lokulandela inkomo ezinsikazi khonapho lami ngayithola ngokuyintshintsha emapulazini ngihawukela umhlobo wayo. Ngikhuluma nje sengicabanga ukuyithengisa ngidinge eyinye,” kutsho uMnu Mnkandla.
Usobhuku omkhulu wakule indawo uMnu Khumalo ebuzwa ngale indaba uvumile ukuthi uyayazi wathi nguye owayithonisayo.
“Kuliqiniso sibili ukuthi ngagweba uNkala inkomo ezimbili ngemva kokuba egamule inkunzi kaMnkandla. Okwenza ngamnika isigwebo lesi yikuthi ungusobhuku ngakho kufanele akhokhele ngobuqotho abantu kodwa yena usesephula umthetho. Lokhu kwakuyindlela yokuthi abantu bafunde isifundo sokuthi kufanele bahlalisane kuhle,” kuphetha uMnu Khumalo.
