uMthunywa
Kasafuni ngibambe ifoni yakhe
UMKAMI ngimazi njengendoda ethembekileyo kuminyaka emithathu sitshadile. Kodwa kulezi insuku akafuni ukuthi ngibambe ucingo lwakhe ngitsho loma egeza. Kwesinye isikhathi lanxa ngifuna ukusebenzisa ucingo lwakhe ukufona kasafuni lakuzwa ngitsho.
Impendulo:
Siyasolisa mpela isenzo somkakho. Kuyacaca ukuthi kukhona okutshaya amanzi angafuni kubonakale efonini yakhe.
Ayikho enye indlela yokulungisa lesi simo ngaphandle kokumbuza ukuthi sekutheni engasafuni ubambe ifoni yakhe, umbuze ukuthi kuyini akufihlayo. Mphumele egcekkeni ukuthi isenzo sakhe lesi asikujabulisi ngitsho kungakho ufuna izinto zibuyele kusimo sakudala.
Kangifuni kugela inwele zensitha
Ngithemba uqine saka Khulu. Kambe kuqakatheke kanganani ukuthi ngigele inwele zami zenzitha ngoba mina kangifuni? Ngingumama njalo kangikuthathi ukubethwa ngumoya. Okhathazekileyo
Impendulo:
Kumele uzikhethele okukwenza ukhululeke empilweni yakho mzukulu, kodwa engingakutsho yikuthi inwele zensitha zisuka zibe lomunye umnuko ojatshulelwa ngabanye abesilisa kukanti abanye njalo kabawuthandi umnuko lo.
Izikhathi ezinengi abesifazana bayadideka ngoba lokhu abakufisayo bacina bengakwenzi sebelandela lokho okukhwabithwa ngabathandana labo. Zenzele isinqumo esizakwenza uzwe ukhululekile nxa ulomunye wakho.
Ubabazala usebusa emzini wami
Unjani Khulu ngicela ungiphathise ngilohlupho lobabazala wami. Khulu akukho okwemzini wethu angakungeneliyo.
Ubabazala lomamazala bayazwana kakhulu kungakho umkami usehlezi engiqathanisa loyise kukanti sehlukene.
Konke esikwenzayo kufanele kudlule kuyise. Uma uyise engavumelani lokunye kwakho umkami ngemva kwensukwana ubuya lezizatho ezingaqedakaliyo zokuthi lokho kungani kungamelanga sikwenze.
Impendulo:
Kusobala ukuthi unkosikazi wakho usondelene kakhulu loyise. Yinto ejwayelekile kakhulu le ikakhulukazi uma umuntu ekhuliswe nguyise. Khumbula ukuthi uyise uyikho konke kuye ngoba akekho omunye umuntu amthemba njengaye ngoba nguye futhi omsekelayo empilweni yakhe.
Ngokufanayo, uyihlozala uyabe engajjonganga ukulehlukanisa kodwa usuka aqhubeke lapho acina khona ekondleni ingane yakhe. Kumele ube lobuciko obukhulu ekulungiseni loludaba ngoba awufuni unkosikazi wakho abone sengathi awumthandi uyise ngoba lokho kuzomphatha kubi njalo akumelanga ukhulume ngalo loyihlozala. Ngumkakho okumele alungise izinto hatshi uyise.
