uMthunywa
UMQEQETSHI weHighlanders uErol Akbay uzaqala umsebenzi kuhlandla lesibili lesizini yeCastle Lager lamuhla edibana leBulawayo City.
UAkbay ufike koBulawayo ngoLwesibili emini. Ukufika kwalumqeqetshi kutsho ukuthi iHighlanders izakuba leqiniso lokuthi yibaphi abadlali abazayigijimela kuhlandla lesibili.
UAkbay uphenduka koNtuthu efice uRoderick Mutuma esengene kuqembu leYadah njalo usethole lomfana wakhe, uPrince Dube esehambile. Abadlali laba basuke kuqembu umqeqetshi engazi lutho. Lokhu kuyinjwayelo kuBosso ukuthi abadlali basuka umqeqetshi engakwazi.
Udletshana olufinyelele uMthunywa luveza ukuba uAkbay udabuke kakhulu ngokulahlekelwa nguMutuma loPrince.
Laba yibo abadlali akade ebathembile ukuthi bazamhlohlela.
Pho izahlohlelwa ngubani nxa abagadli bomqeqetshi bengekho? Lo ngumbuzo ovela kubalandeli ababona angathi iBosso izathwala nzima kuhlandla lesibili.
Womabili amaqembu kenzanga lutho ukubiza abadlali abatsha. Ukudingisisa kwephephandaba likazulu kuthole ukuba amaqembu la azaqina ngokudlalisa abanye abadlali endaweni yokuthi idinge abatsha.
Umaqhuzu weHighlanders uNhlanhla Bahlangene Dube uthe yonke into inhlangene eqenjini.
“Ukusuka kwabadlali angeke lanini kulivimbele iqembu ukuthi lifeze lokho elikufunayo kuligi. Sibafisela inhlanhla abahambileyo.
“Umqeqetshi uyazi umsebenzi wakhe kakuhle ngakho siyamethemba ukuthi uzakuba lamacebo okuvala isikhala esitshiywe nguMutuma loPrince,” kutsho uDube.
Imidlalo yeCastle Lager kuliviki:
Lamuhla: Bulawayo City v Highlanders (Barbourfields), Black Rhinos v Ngezi Platinum (Morris Depot), Triangle United v Chapungu (Gibbo)
NgoMgqibelo: Bantu Rovers v FC Platinum (Luveve), Tsholotsho FC v How Mine (Dulivhadzimu), ZPC Kariba v Yadah FC (Nyamhunga), Harare City v Caps United (National Sports Stadium)
NgeSonto: Shabanie Mine v Highlanders (Maglas), Dynamos v Triangle United (National Sports Stadium), Chicken Inn v Bulawayo City (Luveve), Chapungu v Black Rhinos (Ascot), Ngezi Platinum v Hwange (Baobab)
