uMthunywa
Cornelius Luphahla
IQEMBU lezamasiko leZimnyama Dance Ensemble elidabuka koBulawayo seliveze ukuthi lizimisele ukumela amaqembu wonke amasiko akoNtuthu emncintiswaneni weChibuku Neshamwari.
Leliqembu liveze lokhu ngemva kokunqoba amaqembu alitshumi ehoteleni yeManor kuviki ephelileyo agoqela iNeshanduko, Imvimbi Arts, Iluba Lemvelo, New Age, Harsh Touch, iBambanani, iHloseni Arts, iThandanani Women’s Insemble kanye leNgwenyama Arts.
UMthunywa uxhumane loPhibion Ncube ongumholi weqembu leZimnyama waveza ukuthi uyajabula kakhulu ngokunqoba emncintiswaneni lo wathembisa uzulu ukuthi iqembu lakhe lizanqoba njalo emncintiswaneni welizwe lonke.
“Ngiyajabula kakhulu ngokunqoba emncintiswaneni wamaqembu wonke ezamasiko koBulawayo. Emncintiswaneni lo sithole umvuzo wemali engange-$300 njalo yithi esizamela amaqembu wonke ezamasiko akoBulawayo emncintiswaneni wenkezo yeChibuku Neshamwari ozakuba khona mhlaka 5 Ncwabakazi eWhite City koBulawayo.
“Ingqungquthela ezizamela izabelo zizadibana mhlaka 5 Ncwabakazi njalo sikhangelele ukuthatha inkezo le lonyaka. Ngalokhu ngithembisa uzulu ukuthi njengeqembu sizayithatha inkezo yeChibuku Neshamwari lonyaka noma kanjani,” kuchaza uNcube.
UJuliet Dube ongomunye wamalunga aleliqembu uthe ubonga uzulu ngokusekela iqembu labo.
“Mina ngibonga kakhulu uzulu ngokusekela iqembu lethu eliqhubekela phambili ngokunqoba ngenxa yakhe. Ngitsho ngoba kuviki ephelileyo iqembu lethu lithole indondo yakuqala emaqenjini ezamasiko kuBulawayo Arts Awards ngenxa yabalandeli bethu abasisekeleyo.
“Ngalokhu sizaqhubekela phambili sibajabulisa ngengoma kanye langemigido yethu njalo inkezo sesiyithethe noma nje lungakafiki usuku lomncintiswano,” kutsho uDube.
