uMthunywa
Cornelius Luphahla lo Gladmore Ncube
ZIDIDEKILE njalo zitshwaqe imizimba izakhamizi zelokitshini leNew Magwegwe endlini elekheli elithi 1339 edolobheni lakoBulawayo ngemva kokuba enye indoda yakule indawo ibulele umnawayo ebihlala laye qede yamgqibela eceleni kwendlu.
Insindabaphenduli yendaba le kucatshangelwa ukuthi isilamaviki amabili yenzakele lapho okucatshangelwa ukuthi uMnumzana Ndabezinhle Ncube (28) ubulele umnawakhe uNkosazana Patience Ncube (26) qede wamgqibela eceleni kwendlu wahlanyela ihanyanisi phezulu.
Kuzwakale ukuthi abazali bakamuyi lomnewabo babhubha kudala ngakho laba bebehlala lomunye umnawabo bebathathu kuyibo abagcine indlu le noma nje umuyi kade esebenza kwesinye isitolo esikhulu esiseNtumbane.
UMthunywa uvakatshele kule indawo wakhulumisana lesinye isakhamuzi esiziveze ngokuthi nguMnumzana Mawere nje kuphela wathi kalankani ngesiga lesi wabuya walandisa ngokuthi isidumbu sikamuyi basibone njani.
“Kuthe emavikini amabili adluleyo umnawakhe kamuyi wabika ukuba udadewabo uPatience kamboni akabuyanga endlini. Ngaleso sikhathi saqalisa ukumdinga sayabika emapholiseni sihamba lomnewabo singazi ukuthi nguye ombuleleyo. Kuthe ngoMvulo umnawabo wathola izihluthulelo zendlu kamuyi aezazingabonakali savula silamapholisa sathola kulomqamelo olegazi.
“Sasuka njalo sayakhangela phandle kwendlu okuyikho esathola khona izigqoko zikamuyi zisegabheni elilamanzi zilephunga elibi. Ngemva kwalokho ukhulu wami wathi yena wabona uNcube egebha igodi eceleni kwendlu ekuseni kakhulu wabuya njalo wambona esethwele ulutho waluphosela egodini leli. Ngalesosikhathi amapholisa agebha lapha sathola umuyi ethandelwe ngengubo elomakhalekhukhwini wakhe kanye lesikhwama,” kulandisa uMnu Mawere.
Ekhuluma lentatheli uNkosazana Silindeni Nkomo oyisihlobo sikamuyi uthe umnewabo kamuyi unyamalale ngeSonto kuyonale iviki lakhathesi kabonakali wabuya wathi ubesehluphile kule indawo.
“UNdabezinhle ubethwalise abantu bakulelilokitshi nzima esaziwa ngokuba yisigangi njalo ubehlala ehlupha udadewabo emntshontshela imali yakhe ehlala ethi akamfuni endlini. Labosowabo abakulelilokitshi bebemesaba asazi ukuthi ubebenzani.
“Khathesi ngikhuluma nje kabonakali asazi ukuthi wayangaphi okuveza sobala ukuthi nguye obulele umnawakhe ngoba ngabe kayisuye ubengasoze abaleke,” kutsho uNkszn Nkomo.
Isikhulumi samapholisa edolobheni lakoBulawayo uInspector Precious Simango ebuzwa ngale indaba uvumile ukuthi uyizwile wathi kodwa kakezwa lutho ngokuthi kuhambe njani.
“Kuliqiniso sibili ukuthi kulomuntu otholakale ebulewe wagqitshelwa eceleni kwendlu kodwa khathesi amapholisa asadingisisa ukuthi kwahamba njani ngakho kangikezwa okunengi,” kuphetha uInsp Simango.
