uMthunywa
Nomthandazo Ndlovu
INKAMPANI ebona ngokulungiswa kwenhlanyelo iSeedCo ikhuthaza abalimi kundawo zonke zelizwe ukuthi balime umumbu olithanga ngoba uyavuma ngesikhathi somqando.
UMnumzana Steward Nzura uveze ukuthi ngesikhathi somqando izilimo ezinengi ziyatshazwa njalo kazenzi kuhle kodwa umumbu lo wenza ngcono kakhulu.
Uthe umumbu lo uthandwa ngabantu ngoba umnandi njalo uyaphuza ukuphupha ikakhulu kulabo abathengisayo.
“Ubuhle bomumbu lo yikuthi uyaphuza ukuphupha, uhlala amalanga amahlanu kusiya kwayisikhombisa ulokhe ulobunandi bawo ungakaphuphi,” kuchaza uMnu Nzura.
Kubikwa umumbu lo ulokudla okuqakathekileyo emzimbeni wezifuyo ngoba wenza zibe lesisindo. “Umumbu lo ulenzuzo ngoba nxa ungasathengwanga wonke abalimi balakho ukuwugayisa ubeyikudla kwenkukhu kanye lengulube.
“Umumbu lo ulokudla okwenza izifuyo lezi zibe lesisindo esikhulu kakhulu njalo ziphangise ukuzalana umlimi abelenzuzo enkulu kakhulu,” kuchasisa uMnu Nzura.
Uqhubekele phambili esithi abalimi kumele balime umumbu lo olithanga okuthiwa yi-608 yellow ngoba yiwo opha umlimi isivuno esihle njalo esikhulu kakhulu ngesikhathi somqando.
“Ikhona njalo eminye imihlobo emhlophe layo evumayo ngesikhathi somqando kodwa wona uyaphangisa ukuphupha yikho sikhuthaza abalimi ukuba balime umumbu olithanga ngoba lalabo abasendaweni ezikhatshana balakho ukufika lawo emikambo useselohlonzi,” kuphetha uMnu Nzura.
