uMthunywa
Cornelius Luphahla
AKUBIZWA ozwayo kuzaduma uladuma eSalukazi Art Centre elokitshini leNjube lapho okuzabe kudibene khona abaculi bezesintu ngenhloso yokuthakazelela iAfrica Day kanye lokuthuthukisa ezamasiko.
Umkhosi lo ohlelwe yi-Amakhosi Theatre uzadibanisa amaqembu ezesintu adlula itshumi azamekeza kusukela ngo-3 ntambama ilanga lize liye ngomtsha wendoda lamuhla.
Amaqembu la azabuya njalo adibane ntambama eRainbow Hotel ngenhloso yokuphakamisa ezamasiko kuleli njengoba nje kuyiviki yamasiko.
UMthunywa uxhumane lomholi weqembu leKhaya Arts elingelinye lamaqembu azabe ekhona emkhosini lo, uFuture Dube uthe uzulu alindele ezimnandi ngoba bazamzwisa inzwisa yomdlalo wabo omutsha abazawukhipha lonyaka.
“Ngikhuthaza uzulu ukuthi aphatheke emkhosini lo ngoba kuzabe kungenwa mahala. Okunye njalo njengeqembu sithembisa uzulu ukuthi alindele indaba ezimnandi ngoba sizabadlalela umdlalo wethu omutsha othi Khaladabataba. Emdlalweni wethu lo sizabadlalela inzwisa kuphela,” kutsho uDube.
UFibion Ncube umholi we-Ezimnyama Arts uthe umkhosi lo uyamjabulisa kakhulu ngoba uthuthukisa ezamasiko wabuya wanxusa uzulu ukuthi aphatheke emkhosini lo ezofunda amasiko.
“Umkhosi lo siyawuthakazelela kakhulu njengeqembu lezamasiko ngoba uvuselela ubuzwe bethu. Ngalokhu nginxusa uzulu wonke ukuthi abekhona emkhosini lo ukuze afunde mayelana lokuqakatheka kwamasiko ngoba sizabe sikuveza lokhu ngendlela ezehlukeneyo njengoba inengi selilahlekelwe ngamasiko alo,” kutsho uFibion Ncube.
UNkululeko Nkala odume ngokuthi nguKhuliyo kwezomculo uthe usuku lolu luqakatheke kakhulu ngoba luphakamisa ukuba ngama Africa njalo ujabulela ukuthi umkhosi lo uzakwenziwa elokitshini.
“Mina ngiyalujabulela kakhulu usuku lolu ngoba luphakamisa ukuba ngama Africa kwethu. Okunye njalo okungijabulisayo yikuthi umkhosi lo uzakwenziwa elokitshini okuyikho okugcwele khona abantu njengoba nje ungowokuphakamisa amasiko ethu. Ngokunjalo ngiwubona uqakathekile kakhulu njengeminye imikhosi yabaculi,” kuphetha uNkululeko Nkala.
