uMthunywa
Sengifuna ubambo lwami
KHULU kunjani? Ngileminyaka engu-30 yokuzalwa ngafelwa ngubaba wabantwabami eminyakeni emine edluleyo.
Sengifuna ukuthi ngabe ngiyathola umngane wokuthi siphile sonke. Kangifuni muntu othetheyo. Khulu ngingenza njani ukuthi ngibekwazi ukuthi lo ngumuntu ongifaneleyo. Lokhe ngabhujelwa angikaze ngithandane lomuntu ongubaba. Ngilabantwana ababili umfana oleminyaka eyisikhombisa lenkazana eleminyaka elitshumi.
Impendulo
Ngiyaphila mzukulu. Ngiyabonga ngoba umhloniphile umkakho wamzilela iminyaka emine isenzo esingasenziwa ngomama abanengi. Into yile mama wami, umuntu ongubaba ozisondeza phansi kwakho qala umbuze ukuthi ulomfazi yini noma wake wathatha nxa wake wabalomfazi labantwana bangaphi labo bantu khathesi. Angakutshela iqiniso lakhe leminyaka yakhe angaze aba ngumuntu oleminyaka emilutshwana kuleyakho. Kumele abe ngusowenu noma abemdala kancane kulawe. Lawe ungamfihleli ukuthi ulabantwana ukuze abamukele.
Umkami katshayi uyabulala sengifuna ukumtshiya
NGIDIDEKILE kangazi lokuthi ngithini Khulu. Ngingumama oleminyaka yokuzalwa engu-29 sengileminyaka engu-9 ngithandana lomkami. Umkami uleminyaka yokuzalwa engu-34 njalo uleminyaka engu-7 engithethe. Uhlupho engilalo Khulu yikuthi umkami katshayi uyabulala sesiside isikhathi ngibekezela ngisithi mhlawumbe uzatshintsha kodwa kuyaphambili.
Khulu kalandaba futhi kwezinye izikhathi ungitshaya phambi kwabantu loba phambi kwezihlobo zakhe kanye labantwana. Khulu ngifuna ukukutshela iqiniso uthando kangiselalo ngitsho. Lokhu sokungenze ngaze ngakhomba njalo ijaha lakhona selifuna ukuyavela kanye lokutshada lami. Ijaha engithandana lalo kangilitshelanga ukuthi ngendile. Ngenzeni Khulu ngeluleka?
Impendulo
Kunzima mzukulu ukuhlala lomuntu okuhlukuluzayo emzimbeni kulezinsuku. Kukanti kudala onyoko babesithi nxa bengatshaywa ngomkabo kabathandwa. Umhlaba usuguqukile mpela lokhu yikho okubizwa ngokuthi yi-domestic violence. Okokuqala usuke wahlala laye yini phansi umkakho wambuza ukuthi kungani ehlala ekutshaya njalo kakumyangisi yini ukukutshaya phambi kwabantu. Nxa usuke wakwenza lokhu okwesibili ongakwenza yikuyabikela abangakibo kanye labangakini ngempilo oyiphilayo.
Nxa lokhu kungehlula mzukulu uyabe usukhululekile ukuthi uye emapholiseni uyembophisa ngoba umthetho kawukuvumi ukuthi akutshaye. Umkakho uyakwazi yini ukuthi nxa ekutshaya abantwana bekhangele labo bayahlukuluzeka emoyeni okucina kubenza bangakhululeki. Mzukulu ngiyazi ukuthi isenzo somkakho sephula umoya yikho nje usithi wena kawusamthandi kodwa angithi wawuzwe abanye omama besithi bahlalele abantwana yikho kanye okumele ukwenze. Bekezela mzukulu wami njalo ungadinwa ukutshaya phansi ngedolo ubikele uMdali wakho ngesimo okuso.
Iyatshaya inhliziyo yami nxa ngisiya emacansini
LINJANI Khulu? Ngiyindoda eleminyaka yokuzalwa engu-42. Ngangithethe njalo ngilabantwana abathathu, abafana ababili lentombazana eyodwa. Umkami ubhubhe nyakenye. Uhlupho lwami yikuthi njengomuntu oyindoda ngiyake ngibe labangane besifazana kodwa zonke izikhathi ngingazama ukuthi sihlangane emacansini inhliziyo yami iyatshaya ngamandla. Sengizame ngehluleka. Umkami ngangimlobole ngaqeda kangilaso isikwelede kwethuzala. Nginceda Khulu?
Impendulo
Abantu besilisa abanengi bangatshiywa ngomkabo bahlangana lohlupho olufanayo mzukulu. Okwenzakalayo yikuthi umuntu angatshiywa ngomunye wakhe akumelanga aphangise ukuhlangana labesifazana engakakhitshwa inzilo.
Kukanti njalo amanye amadoda ahlangana labafazi labo embhedeni womfazi owabhubhayo. Kungakho ungalahlekelwa ngomunye wakho ziphe isikhathi sokukhalela isithandwa sakho kanye lokuzila ucansi. Landela lawe isintu sokuthi ucelelwe ngabakibo ukuthi usudinga umngane njengoba engasekho njalo lesikhathi sesiside. Okhokho bethu yikho babethatha isithembo besenzela uhlupho olufana lalolu ophakathi kwalo. Ongakwenza mzukulu yikuthi uye kibo komkakho uyecela ukuthi usufuna ukuthatha. Ungenzenjalo bazakuncedisa ukuthi ungaphindi uhlangane lohlupho olufanayo.
