uMthunywa
Cornelius Luphahla
UMCULO we-RnB uthuthuka ngamandla kuleli nanko phela omunye wabaculi laba uBanele Ncube usehwatshe idlalade elitshisayo njalo uthembisa ukuqhubekela phambili esenza izimanga kwezomculo ngenhloso yokujabulisa uzulu.
UNcube odume ngokuthi nguMaestro kwezokuzithokozisa uhwatshe lelidlalade elithi, You are my number one kuviki ephelileyo ekweleSouth Africa ngenhloso yokujabulisa uzulu.
UMthunywa uxhumane loMaestro oveze ukuthi leli lidlalade lakhe lesithathu.
UMaestro uthembise uzulu uluju lwendlebe andubana acebise abalandeli ukuthi balindele indaba ezimnandi lonyaka.
“Eqenjini lami ngihlabela loBongani Moyo kanye lomkami uSithembeni Ndlovu. Lokhe ngaqalisa ukucula sengakhipha amadlalade amahlanu. Elakuqala ngalikhipha ngo2008 elithi, Incwadi, kulandele elika 2009 elithi, Ndichanetsa, kuze elika2011 elithi Sebezabangazi, kubuye elika2014 elithi Sengikhona besekusithi elitsha engilikhiphe lonyaka elithi You are my number one.
“Ngalokhu ngikhuthaza uzulu ukuthi alindele indaba ezimnandi lonyaka ngoba ngimphekela indaba ezimnandi kakhulu. Okunye njalo ngisazovakatshela endaweni ezehlukeneyo ngizwisa abantu idlalade lami elitsha,” kutsho uMaestro.
UMaestro uqhubekele phambili wathi uyancedisa abaculi abancane ngokubaphakamisa kwezomculo.
“Njengomculi ophila ngokucula ngiyancedisa njalo abaculi abatsha ngendlela ezehlukeneyo. Ekubancediseni lapha ngibancedisa ekukhipheni amadlalade abo ukuze labo bathuthuke kwezomculo njalo siphakamise umculo we-RnB,” kuphetha uMaestro.
