uMthunywa
Thokozile Mbedzi
INHLANGANISO ebona ngezokulima eyeAgritex ikhuthaza abalimi ukuba baqaphele ingozi zomlilo lonyaka ngoba utshani bunengi.
UProvincial Agritex Officer esabelweni seMatabeleland North uMnumzana Dumisani Mbikwa Nyoni uthe lonyaka izulu endaweni ezinengi libe linengi kungakho lotshani bunengi.
Uthe lokhu yikho okwenza balimukise abalimi ukuthi ngazo zonke izikhathi nxa bebasa umlilo baqaphele ukuze ungasabalali ucine utshisa indawo enkulu.
“Lonyaka indawo ezinengi izulu linile njalo lotshani bunengi kakhulu, abalimi ekuphatheni umlilo kumele bananzelele ukuthi awuphunyuki nxa besezindaweni ezehlukeneyo.
“Okunye njalo okubangela ingozi yikuthi nxa abalimi besezilindweni zamabhasi basuka babase umlilo nxa ibhasi ingabuya bayagada batshiye umlilo ungacitshwanga okubangela ingozi enkulu.
“Kukanti kwesinye isikhathi kuyabe kulomoya okudala ukuthi umlilo ucine usiya endaweni ezingamelanga ukuthi zibe lomlilo,” kuchasisa uMnu Nyoni.
UMnu Nyoni uphinde njalo wakhuthaza ababhema igwayi ukuthi babone ukuba bayacitsha izitompi zabo andubana bazilahle ukuze kungatshi iganga kanye lenyamazana.
UMnu Nyoni uphethe ngokukhuthaza abalimi ukuthi bancedisane ukucitsha umlilo nxa usuthe wamemetheka.
“Ngithanda ukukhuthaza abalimi endaweni ezitshiyeneyo ukuthi nxa kungenzeka umlilo umemetheke bancedisane ukuwucitsha ngoba ulakho ukucina ubulala abantu kanye lezifuyo,” kuphetha uMnu Nyoni.
