uMthunywa
MTHWAKAZI omuhle ondlela zimhlophe kule iviki iphephandaba lize lazo njalo indaba ezinambithekayo ngenhloso yokujabulisa umphakathi nanko phela liye layavumbulula ijaha elimajaha mabili elicula umculo kamaskandi kuvungame umphakathi.
Kambe kungaba ngubani umculi ohlabekisayo lo ngaphandle kukaMbongeni Moyo ingadlangadla edabuka eNkayi.
Kayitshayi nje isiginci indoda le iyaphoxa. Othanda ukujabula kule iviki nansi ingxoxo enambithekayo phakathi komculi wodumo lo uMbongeni Moyo (MM) lentatheli yephephandaba likazulu uCornelius Luphahla (CL).
CL: Umphakathi uthanda ukwazi mayelana lembali yakho kanye leyomculo wakho jahelibanzi?
MM: Mina ngazalelwa eNkayi esigabeni seSilobela okuyikho engakhulela khona. Izifundo zami ngaziqalisela eKizito Primary School ngaze ngayaqeda uGiredi 7. Ngaqhubekela phambili ngezifundo zami ngayangena uFomu1 eMsilawobe Secondary School ngaze ngayaqeda uFomu 4.
Ezokucula ngaziqalisa ngo2014 ngesikhathi ngikweleSouth Africa lapho engangiculela iqembu elibizwa ngokuthi Amajaha Amahle. Kuthe ngo2016 ngasungula elami iqembu ngalibiza ngegama lami.
CL: Lokhe wasungula leliqembu sowakhipha amadlalade amangaki jahelibanzi?
MM: Njengomculi osasungula sengakhipha idlalade elilodwa engilikhiphe ngo2016 elithi Ngiyakuzonda kufa.
Lelidlalade ngilikhiphe ngincedisana leqembu laMajaha Amahle engangicula lalo ngoba silokhu sisasebenza sonke noma nje sengasungula elami iqembu.
CL: Ujwayele ukutshayela ngaphi ingoma zakho jaha lakoMoyo?
MM: Ingoma zami ngizidlalela endaweni ezehlukeneyo ezigoqela emitshadweni, emadilini okuzalwa, kuma-shows kanye lakwezinye njalo indawo ezehlukeneyo. Kwesinye njalo isikhathi ngiyamenywa emikhosini eyehlukeneyo ukuthi ngiyejabulisa uzulu.
CL: Abantu bathini ngomculo wakho njalo uthembisa ukubenzelani njengomculi wodumo?
MM: Abantu bayawuthokozelela kakhulu umculo wami njalo bangikhuthaza ukuthi ngiqhubekele phambili ngibadlalela ingoma zami ngoba ngiyabajabulisa. Ngalokhu uzulu ngimthembisa ukumkhiphela elinye njalo idlalade elitshisayo lonyaka kanye lokumphekela iDVD yomhlaba ukuze azibonele ukudla kwamehlo.
CL: Bunzima bani oyake uhlangane labo kwezomculo njalo nkuthazo bani oyipha abaculi abasasungula jahelibanzi?
MM: Ubunzima engiyake ngihlangane labo kwezomculo yikuthi abantu basuka bantshontshe umculo wami bawuthengise ngentengo ephansi okuyikho okudala ukuthi nxa sengiwuthengisa ungasathengwa ngendlela engijabulisayo. Lokhu kwenza ngingathuthuki kuhle kwezomculo ngoba ekukhipheni idlalade kufunakala imali.
Ngalokhu kubaculi abasasungula ngithi kababambelele kwezomculo bengadeli ngoba kuvele kunzima ukucula.
Okunye njalo ngithi kabajonge ukujabulisa uzulu kuphela bengajongi kakhulu imali ngoba vele kayitholakali.
