uMthunywa
Thokozile Mbedzi
INHLANGANISO ebona ngezokulima eyeAgritex isikhuthaze abalimi ukuba bahambe bequma amahlanga omumbu ensimini zabo phezulu kweziqu ukuze uphangise ukoma.
UMatabeleland North Provincial Agritex Officer uMnumuzana Dumisani Mbikwa-Nyoni ubikele uMthunywa ukuthi nxa amahlanga la engasaqunywanga umumbu uyabola.
“Umumbu uyaphuza ukuwoma ngakho abalimi kumele bahambe bequma amahlanga phezulu kweziqu ukuze uphangise ukoma.
“Umumbu omnengi usuvuthiwe kungakho abalimi kumele babone njalo ukuthi uyawoma masinyane,” kutsho uMnu Nyoni.
Kubikwa umumbu nxa usiwa esiphaleni selizwe (GMB) kumele ube ulesilinganiso samanzi esingaba yi-12 phesenti nje kuphela hatshi ukuthi udlule lapho.
“Umumbu kumele ube lesilinganiso sobumanzi esingange 12 percent ungedlula lapho uyabola umlimi laye acine elahlekelwa yinzuzo yakhe.
“Umlimi kungenzeka ukuthi azibone elamathani athize kodwa acine engaselawo lawo mathani ngenxa yobumanzi,” kulandisa uNyoni.
Uqhubekele phambili esithi lomnyaka uhulumende uzavula indawo ezinengi lapho okuzathathelwa khona umumbu ezigabeni usiya eGMB.
“Lonyaka uhulumende uzavula ama-collection point endaweni ezehlukeneyo lapho umumbu ozathwala usuka khona kungakho nxa ungafakwa emasakeni ungakawomisisi ulakho ukubola ungakafiki eGMB ngoba uyabuthelelwa isikhathi eside andubana uthwalwe,” kuphetha uMnu Nyoni.
