uMthunywa
Ngilengane phandle
KHULU: Ngihlala lomkami labantwana abangu-2. Uhlupho engilalo ngilenye ingane phandle, unkosikazi kayazi.
Ngifuna abantwabami bakhule besazana. Ngingamtshela kanjani unkosikazi Khulu ngendlela engasoze imephule umoya?
Impendulo
Andubana sikhulume ngokumtshela kwakho, umntwana lo ongaphandle nxa emdala kulalabo olabo endlini akulahlupho lokumbikela, ngoba uzamtshela umkakho uthi angizange ngikutshele ukuthi ngilomntwana siqala ukuthandana ngoba ngangisesaba ukuthi uzangala. Kodwa khathesi wena usukhona sithandwa sami, lomthetho wothando lwami emntwaneni wethu uthi kumele abuye ngekhaya.
Nxa kuyikuthi umntwana lo umzale selithethene kutshengisa ukungathembeki kwakho kuye, kodwa noma kunjalo, uyasibikela isithandwa sakho. Ukubika kwakho kufuna icebo. Ungacela umfundisi wakho kumbe omunye umuntu amhloniphayo ukuthi ayekwethulela lindaba kumkakho kodwa lawe kufanele ubekhona nxa lokhu kusenziwa.
Umtshele ukuthi into oyenzileyo imbi njalo uyazisola ngokungathembeki kwakho.
Umkami usejola
KHULU: Ngileminyaka engu-28 ngendile ngilabantwana ababili. Umkami wenza ibhizimusi njalo siqala ukwazana ubesaqala manje sesathenga izimota sakha indlu yethu sisonke. Inkinga yikuthi usejola njalo kangihloniphi njengonkosikazi wakhe. Nxa ngithi ngiyakhuluma uthi angihambe manje ngeke ngoba side isikhathi esengisichithile.
Ngike ngaphuza umuthi wokuzibulala ngenxa yezenzo zakhe ngafuna lokuzitshisela endlini ngoba ngeke ngiphume omunye ezongena lula. Ngiyamthanda Khulu, kangazi ngenzeni ngibonisa Khulu.
Impendulo
UKUTHULA mzukulu ngumuthi omkhulu, mekele axotshane lezidandane, wena zithulele ngoba labobantu ahamba labo yisavunguzane sebusika esithi kungana izulu intuli azisabonakali. Ungaxabani laye ngokukhuluma kakhulu, wena thula kuphela. Asiyo into engakwenza ukuthi uchithe umuzi leyo. Nxa sokunje, ongafuni omunye kaphume endlini. Nakekela abantwabakho, konke akulandaba ngaphandle komuzi wakho kuzaphela ngokuthula kwakho.
