uMthunywa
LAKUBOKHOKHO ukudla kwakusehliswa ukuze umlomo usale umnandi. Imihluzi yayikhona yenyama kumbe amajodo amahewu lemihiqo. Thina lamuhla sesilakho okunengi okokwehlisa ukudla esikubiza ngokuthi yizincindamlomo, izincamuncamu ezitshiya umlomo umnandi. Ngesilungu okuthiwa yi-dessert/pudding.
Bakwethu kumnandi lokhu kudla kuthatha inhliziyo. Kudliwa kakhulu emadilini loba emitshadweni kumbe ngezikhathi zeKhisimusi. Akusuthwa uyadla nje uzitike uyekele ngokuthanda kwakho, kumnandi njalo kutshiya umlomo umnandi ungababi. Nanzelela ukuthi kulula ukupheka ama-desserts/pudding lamuhla sizaziphekela iTipsy Trifle sidle sikholise sincinde imilomo, mangalisa abantwana bakho labo makhelwane labangane ngeTipsy Trifle.
Okudingakalayo
— Ikhekhe elibizwa ngokuthi yi-sponge cake elilingana abazakudla leyo-pudding.
— Lenze libe yisiqa.
— Ingxenye yenkomitsho yetiye yejamu ebomvu
— Ingxenye yenkomitsho yetiye ye-sherry yokuphekisa (cooking sherries).
— Inkomitsho zetiye ezimbili zekhasitadi (custard ephekwe yaphola).
— Inkomitsho yetiye yolaza (cream).
— Ingxenye yenkomitsho amaphitshisi (peaches) aphuma egabheni ehluzwe umhluzi.
— Ukhezo lwetiye umhluzi we-almond.
— Ingxenye yenkomitsho umhluzi we-cherry.
— Ijeli (jelly) ebomvu kumbe eluhlaza (green) ephuma efirijini.
— Umnganu oyingumbe wegilasi (glass) omkhulu.
NB: Geza izandla anduba ubambe ezokupheka.
Ukulungisa ipudding/dessert
— Qoba ikhekhe le-sponge libe zincezwana ezilingana umganu wakho.
— Hlanganisa ngejamu iziqa ngambili.
— Faka iziqa lezi emganwini weglasi (glass dish).
— Thela phezu kweziqa i-cherry eyingxenye yenkomitsho yetiye.
— Thela njalo ingxenye yenkomitsho yekhasitadi (custard) eqandayo phezu kweziqa uyekele ingene phakathi kweziqana zekhekhe le-sponge.
— Yekela kuhlale efirijini kuze kuqande kuthi mo.
— Nxa sekuqanda qoba iziqana ezincinyane zejeli ephuma efirijini uzifake emganwini wegilasi (glass dish)
— Thela njalo enye ikhasitadi eqandayo.
— Khathesi tshaya ulaza (cream) ulufake itshukela
— Lutshaye luze lujiyajiye.
— Khathesi luthele phezulu.
— Bona ukuthi ulaza uluthele lwathi yalala emganwini.
— Cecisa phezu kolaza (cream) ngama-cherries abhode umganu wegilasi wonke.
— Usuyenzile manje iTipsy Trifle.
— Ngokunjalo umganu wakho wegilasi usulamabalabala ehlukeneyo atshengisa konke okufakileyo.
— Gcina iTipsy Trifle yakho efirijini uyithathe lapha usuyifuna.
Imnandi mayebabo! Zenzele lawe.
