uMthunywa
Thokozile Mbedzi
ABALIMI bakhuthazwa ukuthi balungiselele amasimu kanye lenhlanyelo ukuze baqalise ukulima izilimo ezilinywa ngesikhathi somqando.
UProvincial Agritex Officer esabelweni seMatabeleland kunhlanganiso yeAgritex uMnumzana Dumisani Mbikwa Nyoni uthe khathesi yiso isikhathi abalimi okumele balungiselele amasimu abo njalo babone ukuba inhlanyelo yabo iyenela ukuze bengacini bephuza ukulima sebedinga inhlanyelo.
Ngesikhathi somqando kulinywa kakhulu ingqoloyi.
“Khathesi yisikhathi sokuthi abalimi balungiselele amasimu abo bakhiphe amahlanga ukuze baphendule umhlabathi.
Amahlanga la kumele bawabeke kuhle ukuze kube yikudla kwezifuyo.
“Lilakho ukugqibela amahlanga la phansi ukuze abengumvundiso sokusiya ngokuthi abalimisi uhlelo lwabo lume njani lendawo abalimi abakuyo,” kutsho uMnu Nyoni.
“Abalimi nxa bephendula umhlabathi kwenzelwa ukuthi kube lezikhala ezizenza kungene umoya njalo lezinanakazana ebezihlasela izilimo esezivuniwe zingaqhubekeli phambili zihlasela okuzalinywa,” kutsho uMnu Nyoni.
Uqhubekele phambili esithi izilimo zesikhathi somqando ziqakathekile kakhulu ngoba ziyangezelela ukudla esiphaleni selizwe.
“Abalimi kumele bakwazi ukuthi izilimo zesikhathi somqando lazo ziqakathekile. Kungakho abalimi kumele balandele izixwayiso abaziphiwa ngabalimisi abaseduzane labo ukuze bathole isivuno esiphezulu,” kutsho uMnu Nyoni.
Uqhubekele phambili esithi abalimi bangalima izilimo lezi kumele bazihlakulele ngoba ukhula lubangela imikhuhlane eminengi.
“Nxa abalimi bangalima izilimo zomqando kumele bazihlakulele ngazo zonke izikhathi kumbe basiphune ukhula ngezandla ngoba ukhula lwenza imikhuhlane imemetheke masinyane izilimo zicine zingakhuli kuhle okwenza isivuno sibe phansi,” kuphetha uMnu Nyoni.
