uMthunywa
YiNtatheli kaMthunywa
INKAMPANI yeDelta Beverages isiyengeze isivumelwano sayo sokusekela iligi yePSL kulisizini loba nje bekukhona amankampani akade efuna ukulwisa ukusekela inguqu ephakemeyo kuleli.
UMthunywa uzwe ngabafakazi abaqotho ukuthi iCastle Lager izabe ikhona kulisizini njalo ukusayina kwesivumelwano kungenziwa iviki le ingakapheli. Ngokubika kwabafakazi laba, iqula lenkokheli zePSL ezibalisa umaqhuzu uKennedy Ndebele losabambe isikhundla sikamgcinisihlalo wePSL uKenny Mubaiwa bekumele bahlale lezikhulu zeCastle Lager ngoLwesithathu.
Inkampani yeDelta Beverages yesula isivumelwano sayo lePSL ngomnyaka odluleyo ngemva kokusekela inguqu ephakemeyo okwamasizini amabili. Isivumelwano esitsha akukazakali ukuthi sibiza imali enganani lokuthi sizaqhuba amasizini amangaki.
UNdebele uchazele iphephendaba likazulu ukuba inhlanganiso yabo isakhulumisana leDelta Beverages kodwa angeke aveze konke okumunyethwe kunkulumo zabo.
“Siphakathi kwenkulumo, angeke ngethule okunengi ngaphandle kwalokhu,” kutsho uNdebele.
“Intatheli labo bonke abasekeli benguqu bazacetshiswa ngokugcweleyo mayelana ngosekelo lwemali kulisizini. Okwakhathesi akwaziwe ukuthi iligi izaqala mhlaka 1 kuMabasa.”
UNdebele usethole inhlonipho ephezulu ngokwenelisa kwakhe ukugcina ubudlelwano obuhle labasekeli beligi kumasizini adluleyo. Umkhokheli lo, oseleminyaka kunguqu nguye njalo owadonsa umabonakude weSuperSport ukuthi abukise amaqembu akuleli.
Nxa iDelta Beverages isethula uhlelo lwayo lokusekela iPSL, kukhangelelwe ukuthi iyengeze imali ephiwa umanqoba weligi kanye laleyo enikezwa abadlali abenza kuhle ekupheleni kwesizini.
Amaqembu adlala kuligi le akhala ethule ngodaba lokuthi imali abayitholayo incinyane.
IDelta Beverages yakhala kakhulukazi ngesiphatho somdlalo kulandela ubudlwangudlwangu obavuswa yimpi phakathi kweZimbabwe Football Association lePSL eminyakeni odluleyo.
Kusenjalo, iPSL isibike ukuba isiqedile ukuhlela imidlalo yamaqembu kulisizini. Isikhulumi sePSL uKudzai Bare utshele uMthunywa ukuthi abalandeli benguqu baqale ukukhangela amakhasi ePSL asebulenjini.
Ngokunjalo ababali bephephandaba likazulu abagijimele kumakhasi kaMthunywa ebulenjini ukuze bathole uluhlu olupheleleyo.
