uMthunywa
ABANTU abansundu babe njalo belalo ulwazi lokulondoloza ukudla okuthize okwesikhathi eside ngezindlela ezehlukeneyo. Lamhlanje ukudla okunengi sekulondolozwa kumbe sekugcinwa kulezi izindawo fridge, deep freezers, cold rooms. Phela izindawo ezinengi sezilamagetsi.
Nanzi izindlela zokulondoloza ukudla okwesikhathi eside:
Imibhida
Ulude, imibhida yendumba, ibhobola, ikhabitshi, itshomoliya. Thatha imibhida uyisikelele ngemgqamu ngokwehlukana kwayo igezise uyipheke njalo, ngokwehlukana kwayo, ipheke okwemizuzu elitshumi. Faka isawudo elilingeneyo, iyekele iphole ubusuyikhama amanzi wonke ngezandla zakho ezigeziweyo.
Thatha imibhida le uyichaye ngokwehlukana kwayo phezu kwephepha lepulasitiki (plastic paper) elangeni ize yome. Isiyomile ifake emigodleni eyehlukeneyo ubhoboze izikhala ukuze kungene umoya.
Imibhida le kuthiwa yimifutshwa. Iyahlala isikhathi eside ingabolanga. Umnyaka wonke, wena utsheba ngentando yakho.
Inyama
Abantu babefuyile inkomo, imbuzi, izimvu kwakuhlala kuhlatshiwe kungasweleki isitshebo lenyamazana zeganga zazikhona.
Ukugcinwa kwenyama
Thatha inyama emanzi ngaphandle kwezangaphakathi, uyibenge ngengqamu ubanjwe ngomunye uyenze izincezwana ezinde ufake isawudo. Khumbula ukugeza izandla ungakayibambi inyama le ichaye yome ithi qha elangeni. Le ke inyama ibizwa ngokuthiwa yimihwabha. Wena ke uzayipheka ngokuthanda kwakho wenze isitshebo ngayo.
Umumbu omanzi
Upheke umumbu omanzi lezinqu lamakhasi awo ufake isawudo nxa usuvuthiwe uyekele uphole ubusuwuhluba amakhasi utshiye amalutshwana. Lake ngawokuthi isiqu ngasinye usibophe kwesinye wuchaye ngokulengisa esihlahleni kumbe ecingweni uzewome. Lokhu kuthiwa lufutho. Lonake ludliwa ebusika lenkobe ngokuvuselela ngokuphinde ulupheke.
Imfe
Abantu bayayithanda imfe kakhulu njalo iphanga iphele. Uyilondoloza ngokunje:
Thatha imfe uyephule ngelunga ngelunga uyihlube amakhasi. Ichaye elangeni ize yome ithi qha. Ifake emgodleni uyigcine. Lokhu kuthiwa ngumhlutshwa. Dlana ngokuyihlafuna uginye umhluzi ulahle amakhafitha.
Nanzelela lokhu:
Zonke-ke lezi zindlela zokulondoloza ukudla kungalahlekanga ama-vitamins okwakha imizimba yethu. Ukuba kuphekwa njani uPheka loMaMoyo uzalandisa ngokupheleleyo khona lapha. Wena okwakho yikulondoloza.
