uMthunywa
Thokozile Mbedzi
ABALIMI esabelweni seMatabeleland South eGwanda bakhala ezimathonsi ngamasela asebaqedele izifuyo.
Kubikwa abalimi esiqintini seNhwali bacatshelwa yizifuyo ezibalisa imbuzi, inkomo kanye labobabhemi malanga onke ngenxa yamasela la angaziwayo ukuthi ngawangaphi.
UMthunywa ukhulumisane loMnumzana Edward Nkomo otshontshelwe imbuzi ezingu-15 othe uhle wavala isibaya ngemva kokutshontshelwa imbuzi zakhe.
“Imbuzi zami zabonakala zithintwa ngenye indoda nguTom Maphala wambuza ukuthi uzisa ngaphi wathi ngezakhe uzithengile uzisa komalumakhe esigabeni sesiTakeni.
“Ngibuhlungu ngoba imbuzi zami zonke zihambile njalo laye kabonakali sesimdinge saze sadela labomakhelwane kodwa sesibikele amapholisa ngodaba lolu,” kutsho uMnu Nkomo.
Omunye njalo umlimi othande ukwaziwa ngokuthi nguKineyilwe Sijiye uthe bakhathazekile kakhulu ngokutshontshwa okwenzakala esigabeni sabo.
“Mina ngibuhlungu kakhulu ngokutshontshwa kwezifuyo okwenzakala esigabeni sethu ngoba izifuyo ziyaphela kusa kwamalanga.
“Sifuyela amasela ngoba yibo abatshontsha izifuyo zethu thina sisale singela nzuzo kuzo. Besicela ukuncediswa kakhulu ngamapholisa ngoba sesithwele nzima ngokusebenzela amasela labantwana bethu bacina sebesehluleka ukuyaphambili ngezifundo ngoba singasela okokubabhadalela,” kuchaza Nkszn Sijiye.
UMnumzana Ayipheli Moyo laye ongumlimi uveze ukudabuka ngokuphelelwa yizifuyo zabo.
“Sesithwele amagabha avuzayo ngamasela la atshontsha izifuyo zethu malanga onke. Sicela labo abatholakala belamacala okutshontsha izifuyo bajeziswe sibili ngoba bayakloloda ngobubi abasenza bona,” kutsho uMnu Moyo.
Isikhulumi samapholisa esabelweni seMatabeleland South uInspector Philisani Ndebele uthe udaba lokutshontshwa kwezifuyo eNhwali alukafiki ewofisini yakhe.
