uMthunywa
Cornelius Luphahla
NGENHLOSO yokuthuthukisa umphakathi iqembu leKhaya Arts selisungule uhlelo lokufundisa intsha ngezamasiko, ezempilakahle, imisebenzi yezandla kanye lezemidlalo.
Leliqembu lelokitshini leSizinda edolobheni lakoBulawayo liqale ukuqhuba uhlelo lolu kuviki ephelileyo ngempelaviki eTshabalala.
Umqondisi weqembu uFuture Dube uthe umkhankaso wabo lo abawethe ukuthi yiHlangana Labatsha Program wenziwa ngempelaviki emini emagumeni enguqu akule indawo.
“Maviki onke siyabe siqala ngokufundisa intsha ngendlela okufanele iziphathe ngayo kungakhathalekile ukuthi yintombazana kumbe lijaha.
“Izifundo esizabe siziqhuba lapha zigoqela ezokuziphatha kuhle kanye lokuzivikela emikhuhlaneni etshiyeneyo egoqela ingculazi kanye lengulamakhwa.
“Okunye njalo sibakhuthaza ukuthi baqakathekise ukuzisebenzela ikakhulu ngokwenza imisebenzi yezandla ukuze bazithuthukise. Lokhu sikwenza ngamalanga atshiyeneyo kusiya ngokuthi ngalelolanga sikhethe ukufundisa ngani,” kutsho uDube.
UDube uqhubekele phambili njalo wathi bakhangelele ukuphakamisa ezemidlalo yikho kusiba lemidlalo ngemva kwemfundiso le.
“Thina njengeqembu lokujabulisa uzulu sikhangelele njalo ukuphakamisa ezemidlalo yikho nje ngemva kokufundisa intsha emkhankasweni wethu kusiba lemidlalo etshiyeneyo. Imidlalo le igoqela owenguqu kanye lowebhola lezandla.
“Isifiso sethu yikuthi ngabe siyathola imali yokunika abadlali abenze kuhle imivuzo kodwa sikhangelele ukuthi eminyakeni ezayo nxa sesilemali sibancedise abadlali laba ukuze bathuthuke kwezemidlalo,” kuphetha uDube.
