uMthunywa
BABENGASOMI abathi ubunandi uyazenzela bakaMthwakazi. Nanku phela iphephandaba likazulu lihlala liphethe ezimnandi kuphela lakule iviki lize lengadlangadla yeqembu lomculo we-rhumba elingena kuxege ibhulugwe endodeni.
Kambe lingaholwa ngubani leliqembu ngaphandle kukaPrefect Mvundla ijaha elimajaha mabili. Kayitshayi nje isiginci lindoda iyaphoxa. Othanda ukujabula umnyaka wonke kaphatheke kule ingxoxo mayelana laleliqembu ephakathi kwentatheli yephephandaba likazulu uCornelius Luphahla (CL) lengqungquthela kwezomculo uPrefect Mvundla (PM).
CL: Akuthi fahlafahla jahelibanzi mayelana lembali yakho kanye leyomculo wakho?
PM: Mina ngizalelwa eTsholotsho esigabeni seMadlangombe ngasengisiyafunda esikolo seNemane. Ukucula ngingathi kusegazini ngoba ngaqala ngikuGiredi 5 ngesikhathi ngisahamba ngithwele ikatali yesigubhu esikolo.
Kuthe ngomnyaka ka1998 ngaqala ukucula ingoma noma nje ngangingakakhiphi idlalade ngenxa yokuswela imali.
Ngo2002 ngasuka kuleli leqembu lami sayadinga umsebenzi kweleSouth Africa. Kuthe ngo2008 ngahlangana khona loToddy Makhakha odabuka eKezi onguye owangincedisa ukukhipha idlalade lami lakuqala. Ngalesisikhathi ngahle ngaqhubekela phambili ngezomculo sokuze kunamuhla.
CL: Lokhe wasungula iqembu lakho selakhipha amadlalade amangaki mfoka Mvundla?
PM: Lokhe sasungula iqembu lethu sesikhiphe amadlalade ayisithupha. Elakuqala salikhipha ngo2008 elithi Umhlaba, kuze elithi Mamgudlwayo elika2010, kuze elithi Bekisandla elika2012, kube lelika 2013 elithi Vereza kuzocina ngelika 2015 elithi Sebetshuna ama-flop.
CL: Abantu bathini ngomsebenzi wakho wobuculi owenzayo jahelidala?
PM: Abantu bayawuthakazelela kakhulu umsebenzi wami njalo bangikhuthaza ukuthi ngiqhubekele phambili ngomsebenzi lo engiwenzayo. Inengi lingikhuthaza ukuthi ngilivakatshele ngilizwise ingoma zami. Ngalokhu ngizagcwalisa izifiso zabo ngibavakatshele ngibuye njalo ngibakhiphele elinye idlalade elitshisayo lonyaka.
CL: Njengomculi wodumo akubikele uzulu ukuthi yibaphi abaculi osuke wasebenza labo lokhe waqala ukucula?
PM: Mina kangilabandlululo kwezomculo ngakho sengisebenze labaculi abagoqela uClement Magwaza, uAllen ndoda, uTjabuda, uFortue Dawu, Izintombi Ezinhle, loNdux Junior, njalo ngisazosebenza labanye abaculi abatshiyeneyo.
CL: Kungani ukhetha ukusebenza labanye abaculi ungazimeli wedwa mfokaMvundla?
PM: Okwenza ngikhethe ukuncedisana labanye abaculi kwezomculo yikuthi nginanzelela ukuthi singasebenza sibambene njengabaculi siyathuthuka masinyane ngoba kuba lula ukuthi sibonisane.
CL: Umphakathi uthanda ukwazi ukuthi uvame ukudlalela ngaphi ingoma zakho jahelibanzi?
PM: Ingoma zami leqembu sivame ukuzidlalela kuma-shows, emitshadweni, emadilini okuzalwa kanye lakweminye imikhosi etshiyeneyo esiyake sibizwe kuyo.
CL: Bunzima bani eliyake lihlangane labo njengeqembu lezomculo njalo nkuthazo bani oyipha abaculi abasacathula?
PM: Ubunzima esiyake sihlangane labo kwezomculo bunengi kakhulu sibili. Lokhu kugoqela ukuswela imali yokukhipha idlalade ikakhulu ngesikhathi sisasungula leliqembu. Okunye njalo abantu bayasintshontshela umculo wethu bawuthengise ngentengo ephansi okudala ukuthi nxa sesiwuthengisa abantu bengasawuthengi kakhulu ngoba sebejwayele otshiphileyo.
Kubaculi abasasungula ngikhuthaza ukuthi babekezele noma behlangana lobunzima ngoba vele kunzima kwezomculo. Okunye njalo ngithi kabajabulise uzulu babuye bamhloniphe njalo.
