uMthunywa
Kasangijabulisi emacansini
Ngicela uncedo Khulu. Ngangendile kodwa ngasuka ngoba ubaba lowo wayengihlukuluza. Ngake ngahlangana labanye kodwa hayi khathesi sengimtholile owehlukana lomkakhe sesilomnyaka sisonke.
Iqiniso Khulu yikuthi akukho engikuswelayo, njalo kangisoli lutho. Ubaba lo ulothando njalo uyangenzela konke nje owesifazana angabe efisa ukuthi owesilisa amenzele. Uhlupho Khulu lusemacansini, kangizwa lutho nxa sihlangana uyazama ukungiphulula kodwa kuyala ukuthi ngithokoze. Umbuzo wami Khulu yikuthi uhlupho lukimi yini njalo ngingaluqeda njani? Umkami ngiyamthanda, Khulu ngenzeni? Kwezinye izikhathi ngize ngifikelwe ngumkhumbulo wokuthi mhlawumbe yikho okwenza wehlukana lomkakhe. Ngiyabonga.
Impendulo
Awusatshongo mzukulu ukuba ihloka lakhe liyagamula kumbe libuthundu. Nxa kuyikuthi ihloka kaliphakami, kungabe nguye olenkinga kodwa nxa libukhali liphakama hatshi yena umsulwa-ke. Kuyadingakala ukuba konke lokhu ukubeke sobala. Ngezinye izikhathi inkinga kungabe ikuwe ngoba umkakho uyazama ngamandla onke ukuba akuphulule ukuze igazi litshise kodwa elakho lala lokhu liqanda mo.
Kuyadingakala ukuba ubonane lezalukazi zikutshisise umzimba, ukuze owesilisa othandana laye engavele akuthinte uzwe igazi ligijima. Kuyadingeka futhi ukuba nxa ususiya endlini yakho lomkakho ukhohlwe yonke eminye imikhumbulo olayo ucabange wena lejaha lakho.
Ungavumeli ukuya emacansini ingqondo zikhasa phakathi kwamalahle ngoba ngezake akujabulise ngitsho umkakho.
Ungabona imbiza yabogogo isehlula ulakho ukuvakatshela laba ngesiNgisi okuthiwa ngama “marriage counsellor” balakho labo ukuxoxa lawe ukuze kubanguleke ithumba lakho.
Ijaha lami limithisile
Sakubona Khulu. Ngilohlupho, ijaha ebengithandana lalo lithi lona selimithisile njalo lithi kumele liyovela. Mina bengizigcinile ngisithi kumele siqale sihlanganiswe ngomtshado laye. Ngithini Khulu ijaha lami bengilithanda kakhulu ngeluleka. Mina ngileminyaka engu-21 njalo ngiyintombi nto.
Impendulo
Ngikhona mzukulu ngiyaphila. Ulenhlanhla yamaSwazi mntwana. Kambe ngabe lesisiga sikuwele lisanda kutshada ubuzakuphatha njani lokhu? Inhlanhla nansi umvundla uzivukele esikhundleni, okokuthi ijaha lelo belingaziphathanga ngitsho. Ukwephuka kwenhliziyo asikufa komuntu. Lo ukudanisile, kuthathe njengesibusiso lokhu. Hlamba uhlale ugeza uthule ungaze wajaha ukuthi lawe usumkhawulisa ube usufuna ukuthatha inkelu uthi ngabantu. Linda ungaze wavuma njalo nxa efuna ukubuyisana lawe ngoba uzakwenza i-spare wheel.
Usebonakele thula uthi zwi. Wena awusimuntu olingenwe yikuthi uthathwe ngumuntu ohamba edinga. Liyeza mzukulu elakho ijaha elilamazinyo amhlophe athe nke. Ngiyacela ngomusa mzukulu, zifundise ukududuzeka usithi wena kwedlule.
Ugeze ngesepa enhle owakho uyabuya. Ngiyabonga.
Ngingene esithenjini ngingazi
Ngithemba uqine saka Khulu ngingusisi ole-27 ngendile labantwana ababili. Ngathandana losabantwana ngo2008 leso sikhathi wayelomama womntanakhe oyedwa lubaba wathi kimi balezinkinga ku-relationship yabo. Waphinda wathi umkakhe kafuni ukuyahlala ekhaya kungakho wathi kasamthandi, mina ngavuma ukuyahlala ekhaya.
Kungakho ngo2012 ngabuya eGoli ngifuna ukubona ukuthi wehlukana lomkakhe ngamthola ehlala yedwa for 2 months ngasengisiyahlala-ke ekhaya. Uhlupho yikuthi ngahlangana lesinye isihlobo sendoda sathi kimi ngifunani esithenjini ngimncane kangaka mina ngathi angikho esithenjini wathi umkami kazange ehlukane lomkakhe lokhu bethandana futhi balomntwana omncane, mina sengilabantwana ababili. Umkami nxa ngimbuza uvuka ngolaka kangiphenduli ngile-stress ngilapha kangisakwazi ukuthi ngithini, ngihlale kumbe ngitshiye?
Impendulo
Zwana mina mntwana ukutshiya lokuhlala ngenye indlela. Ijaha lakho leli liyakunika ukudla na? Liyakugqokisa na?
Lliyakunanza yini na? Ubonanzelela mntanami emhlabeni lapho kulabo lahlangihleke olahla ngidobhe, okhafula ngiginye. Yizo i-character zabanye abantu emhlabeni. Awuboni yini ukuthi uphakathi komhlane lembeleko? Ijaha lakho liyakuthanda kodwa lilula emkhumbulweni wokuzithiba. Nxa yena engakutshelanga lokho ekubonisa izizatho zonezo engikutshele zona ekuqaleni ungazihluphi ngabothathawese.
Vala umlomo uthule uthi zwi, ugcine abantwana benu. Impilo yomuntu ifana lomgwaqo olamadundulu. Uzathi uthi uyatshiya, iqiniso lithi lingatshona ilanga wonke uyaphumula, funa uthi uyaphumula uphumule emlindini ohlala inyoka. Ukuhwabha lolaka lomkakho yikuvikela indaba yothando lwenu. Uzatshiya uthi uboneni? Thula uthi zwi uginye isidwa ungabi yinhlekisa esigabeni ngokutshiya umuzi wakho omuhle kangaka. Yebo kambe thina seyedlula indulo eyayisithi inkunzi ilola impondo ezidulwini. Mfanami ezakhathesi iziduli zilempolompolo. Sengithe ungayingeni eyokuzwa. Iqiniso lithi okulempondo akugoqelwa emgodleni zekele impondo zizithutshele.
Phola ntombi uthi zwi ungakhathazeki njalo ungahlokozi inyoka emlindini wayo. Iyazi ukuthi izazikhupha njani. What a blessed lady you are with those two children osufuna ukubenza intandane bondliwe yindoda engabazaliyo yena uyise ekhona.
