uMthunywa
Tina Lobs Buhegwedu Dube
Zwakazwakalobana tataTjimongamavu nabakaTjimongamavu nebana babo kusina unoziba kuti umwe ndiyani munzi.
Kwakakugala kupfugwaniwa koga, kutukaniwa usungake ukaziba kuti banhu banotjila tjini. Zwanana zwakhona zwakazwisingawhe zwigala zwigwa koga nebazwadzi begala bakawangula. Banhu bakabegala bewangula ibo bazwadzi. TataTjimonga bakabekundiwa nonkadzikulu koga bakabakatjenjela. Bakabekundiwa kumasimba koga kun’holo bakamusa. Bakabeziba kuti banosupula tjini hapadzahitjelana. Lubaka gunjinji tate kwakakuli ibo basiibo.
Baka begala betjinya lubaka gose ngono tjibhakela tjonkadzikulu nditjo tjakatjibasa muzila.
Kana nyinyimbi inozwiziba. TataTjimongamavu baka basingatjinye munha wabo koga. Bakabezibgwa muntunhu wabo wose kuti bana luboko. Bakabetola basapiwa. Bakabezwipa. Beswada. Nelubaka gothama zwinhu izwezwi bakabeguziba. Kana manlembe tjotamba kwabhula. Nkadzikulu panlomo wakaakapiwa. Anatjipiwo. Eleba akaleba nezwisingalembe. Asina tjinosumbikiwa. Waka asingabudziwe tjinhu. Alibandanadzo alibambuyanadzo. Tjinhu tjitjo nogala natjo ukatjiziba, tataTjimonga nayibo bakaboziba kuti nkadzikulu wakapfugwa nembizi pafuba, zwilopa hakuna.
Kwakati umwe nsi beyenda zwabo sebanhu banodana basina tjabanokumbula bakawigwa nemahha isihoma.
Bakanunga kwama tjihhele mari. Yakabakona bala. Bakahaka bakahaya kuti bayitetjini. Bakati batukutila nokumbula nhutana akabhuda nalo. Bakabvumilana kuti mari ngayitshigwe pasi. Yakatshigwa. Nhutana wakaana lebeswa kuti kene kwatini nkadzi unowhozuwa. Wakahaka zila yokuti mari angayidusa tjini payili kutikene nkadzi ozuwazwe isitongowanika. Wakadana nkadzikulu kuti batjinda kanyi eti mari banowhopela bakayibona. Balimuzila wakati nkadzi ame muntuzi unobuya utjanda kuhango. Ejalo enyepa.
Wakalabuka enda kwa akateya newaya akaswika ewana kwakabhakhwa luhulo. Wakatola luhulo igogu eyenda nago padziba laakaateya whobe. Wakanowana kwakabhakhwa hobe whuluwhulu. Wakatola luhulo egusa mudziba etola hobe enoyisungilila pakapana luhulo eba ehanduka ebgwilila kunkadzikulu. Lubaka gwakagwaba gulefulefu koga nkadzikulu hazokubona ngobe nkumbulo waka ulikumari ehaya kuti angabasungisa tjini tataTjimonga asale edlazwe yose nebana babe. Unojalo kati mdala watjiwuntangela, wawundla zwitshitshina wapedza. Manlembe wakatjatamba kale. Nzano wakawazan’gwa ukapela.
Nlume wakahha eti kunkadzi ngatitongopinda kwandakateya tilingila pamwe ndakabhata. Bakati benoswika kuvula benowana luhulo gwakabhakhwa. Nkadzi wakatjenama kuti luhulo gungabhakhwa muvula nayipi zila. Akabamahula.
Bakati benoswika palukuta bewana kwakabhakhwa whobe nkadzikulu epelegwa nemate. Kwakakwatanga nemari, kukaba luhulo ngwenu kwakakwabawhobe inowan’wa yakahitjegwa muntshibha. Nkadzikulu wakabva akumbula kuti tjikulu tjinowhohha. Batjiba muzila bonda tataTjimongamavu bebabebona mbudzi ilimile nemakumbo mabili idla tjihalawunga. Bakatondekela bakaTjimonga beti kubali ndi Magistrate unodla tjihalawunga. Nkadzikulu wakawha koga meya ilikumari. Hazotongobonesesa. Wakakuta malebeswa.
Buloyi gokukwenyezela gukakumusa. Hakuzotongonoti poni. Nkadzikulu wakazibisa bose banhu muntunhu. Nemari yakayohakiwa. TataTjimongamavu bakabva balamba betsha pasi beti ibo hakuna tjabakatongobona. Nemari inolebgwa bakayilandula. Bakati habazotongohangana kene ikowha nekwayo. Yakabatshibilili. Kwakamuka hhoba isihoma. Banhu bakabakalinga kuti nkadzi unalebeswa ngono zila yokuti mari iwan’we kene ilolebeswa lakona kwakakukona. Bakanotsha pakapeyi yakabigwa bakayihaya. Kwakakulakidzake iko kuti kwakakwatongotshiwa.
Bagalisana nabohe yakabakona kukayi ngayitjinda kukhutha. Nayiko kukhutha mdala wakaswika elamba bedzotini ekona. Bakababona kutikala kwakakusina. Kwakati hule kwelubaka khani ilamba pela Nsumikilisi wakadana bakabona kutikala. BakaTjimonga bakaba ibo boga.
Bakayileba bakayilondolodza sekwayatikala. Baka bala kuti iwhoyo nsi ihhuba lin’ompela pabakanowana hulo yakabhakhwa muvula nehobe kusi kwelukuta. Bakapedza beti “Nawebo magistrate takakubona udla tjihalawunga” Tjinyolotjo magistrate wakagwadziwa neletjihalawunga. Wakabva ati kubanhu bakabali mun’umba yemilandu ngakuhakiwe dokotela. Nkadzinkulu ayende kunolingwa banhu basakapelela min’holo. Nkadzinkulu wakatjenama koga ebona kuti nyunyi yasupula nemari hangatjayiwane.
Wakadzoti anobalakidza kuti kwakayenda tjini kuhaya unowuwhilila. Ndiyani waka ekotjawhilila mpengo unoti wakabona nsumikilisi edla tjihalawunga. TataTjimonga bakabhuda basabon’wa nlandu. Batjiba kuhhe bakawhakala bozwitema beti ndibo ntunhu wakantunhumala usingatanhike, pasi pakukuta kwakawoma kwakakona hhowu nehumba, nkanganyidzi wemilandu unoyithama tjimongamavu butji gusingadlike.
[email protected] <mailto:[email protected]>
0912 815112/011 633639
