uMthunywa
Kabangifuni ngoba ngiyisigoga
KHULU abantu bakomkami bathi mina kangimfanelanga ngoba ngimubi ebusweni njalo ngigogekile enyaweni.
Angazi ukuthi ngenzeni ngoba umkami yena wangithanda nginjalo kodwa bona bahlala bengithethisa bethi ngibuyele kithi kangimfanelanga umntanabo ongumbalisi. Ngenzeni Khulu, ngibuyele kithi na?
Impendulo
Kanti wena vele wakhonjiswa yizihlobo kumbe ngumkakho? Kungani usufuna ukulahleka nje ngokuqakathekisa bona lenkulumo yabo eyisichitha. Bayakwazi ukuba umkakho ukuthandelani? Ngiyakholwa ukuba lina lobababili liyathandana yikho wakhetha wena phakathi kwamanina agcwele kuleli.
Wena ungalaleli abantu ngoba uthando ngolwenu libabili. Ubulima buhambelana ngaphi lomendo. Nxa umkakho ekufuna unjalo, hlalani hatshi ukufuna ukuphilela abanye abantu. Banengi abantu behlala labantu abaphila lobugoga, okukhulu luthando nje mzukulu.
Ungavumeli izitha phakathi kothando lwenu.
Sengimtholile engimfunayo kodwa…
Linjani Khulu? Ngiyintombi eleminyaka engu-25, sengimtholile engimthandayo njalo olempawu zendoda engifisa ukuphila layo impilo yami yonke sehlukaniswe yikufa. Uhlupho kodwa nantu, indoda le kayikangikhombisi.
Ngincedisa Khulu ukuthi ngingenza njani ukuthi angibone njalo angikhombise. Ngiyazifela ngaye kodwa ngesaba ukumtshela ukuthi ngiyamthanda.
Impendulo
Esintwini vele kuyazila ukutshela owesilisa ukuba usemalahleni othando ngaye. Into ongayenza yikuba uzidlise satshanyana eceleni kwakhe, laye uzaze abone ukuba nansi intombi angakha layo umuzi. Hlala ungobonana laye sonke isikhathi, ubonise ukukhathazeka ngokungamboni kwakho. Uqalise ukuba lokho okwenzayo empilweni umphathise njalo ube umeluleka ngendlela enhle yempilo.
Umbonise ukuba wena ungumuntu onjani njalo othandani futhi empilweni. Konke lokhu akuvele ekuxoxeni kwenu nje, hatshi ukuba lawe uhle uzithengise. Zama ukwazi ukuba yena empilweni uthandani phela. Esintwini sithi zithiywa ngezikudlayo. Lapha kangitsho ukuba uhle umnike icansi engalicelanga kodwa ngitsho ukuba ukhangele okunye nje, empilweni lapho okulenhliziyo yakhe khona.
Nxa kungumuntu othanda abanawakhe kumbe imuli yakhe, kuhle ukuba ngaso sonke isikhathi xoxa ngayo, ukuze athi loba edinga umuntu angamtshela ngemuli yakhe ezwe efisa ukukubona. Bambelela ekwenzeni kuhle lokho akuthandayo. Akusicala ukumcela ukuba kelivakatshe lonke, lixoxa nje okwehlukeneyo. Kwesinye isikhathi laye uyazifela ngawe kodwa wesaba ukuyitshaya ekhanda.
