uMthunywa
YiNtatheli kaMthunywa
NGESONTO ukaputeni weqembu lesizwe kumdlalo wenguqu uWillard ‘‘Salt and Vinegar’’ Katsande uzakhokhela amaWarriors kumidlalo yomqhudelwano wenkezo yeAfrica Cup of Nations.
Umdlali lo ungena okwakuqala kulinkezo njalo phambili kokuba akhokhele isizwe, uKatsande wethule udletshana lokuthi wakhula nzima engazi lokuthi engenelisa ukufeza iphupho lakhe lokudlala unobhutshuzwayo.
Umdlali lo wakhula esebenza emapulazini kuleli.
Udaba lwempilo yakhe esakhula lunikeza umzekeliso kubadlali abasacathula ukuthi bengadeli nxa belesifiso sokudlala kumbuthano enjenge-Afcon.
Abanye bathi uWillard Katsande, uyinsika kuleliqembu ekuthini linqobe kunkezo yeAfcon ka2017 eseGabon.
UKatsande ungomunye wabadlali abafana loBruce Kangwa abenelisa ukuqinisa unyawo enkabeni yenkundla, ukutshiya ungathi ukhume into emunyu.
Kungxoxo ephoselwe ebulenjini kuleliviki, uveze ukuthi uzatshada lesithandwa sakhe njalo ngemva kokudlala ku-Afcon le ukhangelele ukusayina isivumelwano esitsha leKaizer Chiefs.
Njengoba amaWarriors eqala ukudlala kunkezo yeAfcon ngeSonto, nansi imbali encinyane ngoKatsande.
Ngubani owakuqamba ngebizo elithi-Willard?
Ngubaba. Wangiqamba ngoba waye ngumlandeli wenye injini yangakithi uWillard Khumalo owayetshaya ibhola elilenkosi phakathi. Loba sewadlula emhlabeni, ngibe lenhlanhla yokuhlangana laye ngaphambi kokuthi adlule emhlabeni.
Kufanele ukuthi wakhula uphakathi komhlane lembeleko phela?
Ngitsho. Usizi belubuzwa kimi. Ngikhule nzima ngangisebenza epulazini. mina
Sizwa bethi uthanda ukulala?
Liqiniso sibili. Ukulala emini yinto yemihla kubadlali ikakhulu nxa kulomdlalo oseduzane. Lokhu sikwenzela ukuphumuza inyawo. Banengi abadlali ongathola ukuthi bayakuthanda ukulala emini.
Kuyini okunye okwenzayo nxa ungadlali?
Ngiyazihlalela nje ngibuke ama-series kumabonakude.
Yiwaphi ama-series okhuluma ngawo?
Angijwayelanga ukuwabona kumabonakude ngoba ngingasuka ngiphazamise ingane zami zizibukelela opopayi lezinhlelo zazo. Ngithanda ama-series anjengePower, Blacklist, Confidence. Ngiyawa-downloader bese ngiwabukela ku-laptop.
Ngubani obengacabanga ukuthi uKatsande ulesikhathi sokubuka amafilimu ku-laptop. Ukhuluma ngengane, ngezakho? Zingaki?
Yebo ngezami. Zimbili. Omunye uleminyaka eyisikhombisa, omunye uleyisitshiya galolunye.
Lihlala libathathu lengane zakho?
Yebo, sihlala sobathathu. ngilomama ongisizayo ofika atshayise. Nxa ngihambile kuza umzawami ohlala eKrugersdorp ezobakhangela.
Usukhulisile. Utshadile?
Hatshi. Angitshadanga. Ngilinde ukusayina isivumelwano esitsha leKaizer Chiefs. Nxa ngingakwenza lokhu ngeke ngisachitha isikhathi ngizahambisa amalobolo.
Amalobolo? Kanti ngowaseMzansi umama wezingane?
Umama wezingane ngowaseZimbabwe kodwa asisazwani. Umuntu engizatshada laye ngoweNingizimu Afrika.
Yintokazi nje yaseCape Town esengithandane layo iminyaka emithathu. Nguye njalo ongifundisa isiZulu.
Ibizo lakho lokudlala elithi ‘‘Salt ’n Vinegar’’ livelangaphi?
Ibizo leli ngilithole sengiku-Kaizer Chiefs, bekukhona enye insizwa uLuthando Zibeko. Yiyo eyanginikeza ibizo leli.
Angilaso lamanje isiqiniseko sokuthi lavela sekutheni kodwa ngokwazi kwami kungenxa yama-chips eWillards, i-salt and vinegar.
Kungani pho uZibeko aqoka i-salt n vinegar?
Ngiyake ngizwe okuhlukeneyo kodwa konke kuyahlekisa. Abanye bathi ngilisawudo leKaizer Chiefs, abanye bathi indlela engidlala ngayo itshiya izitha kungathi zinathe i-vinegar.
Udla kabili ngelanga? Kungani?
Angidli ekuseni. Angikujwayelanga. Ngiya ejimini ngingadlanga. Ukungadli ekuseni ngakujwayela ngisakhula ngisebenza epulazini. Bengivuka ekuseni singekho isikhathi sokudla futhi kungekho ukudla kwezinye izikhathi.
Kwacina kungumkhuba ukudla emini imisebenzi isiphothuliwe. Bengivuka ekuseni ngiyesenga izinkomo bese ngiyohlahla umoba ngenze leminye imisebenzi yasepulazini.
Usawukhumbula umholo wakho wokuqala?
Yebo umholo wokuqala bekuyi-US$100. Bengidlala kuFrontiers yaseMutare ngo-2006. Bekuyisikhathi sokufika kwedola laseMelika eZimbabwe. Imoto yokuqala bekuyi-BMW 3 Series. Ngiyithenge sengikuChiefs.
Uyenzeni ngaleyomali?
Ngathengela umama ukudla.
Yikuphi okunye osukwenzile ngemali oyithole kubhola?
Ngakhela umama umuzi omuhle eZimbabwe, ngafundisa lomzukulu wami kusukela eqala isikolo. Ngiyaziqhenya ngalokho.
