uMthunywa
Cornelius Luphahla
KUDABA olusansumansumane olutshiye izakhamizi zesigabeni seDlawa eNkayi zitshwaqe umzimba kulesakhamuzi esivelelwe ngumhlola we-paper bag ebigcwele inhlanyelo emzini waso sathi ngokuyivula nje safa.
Impicabadala ye-paper bag eqhamuke ingathwalwanga muntu yayakuthi qithi endlini yakhe yenzakale kuviki ephelileyo.
Umuyi uVusumuzi Sikhosana kubikwa wathi ebona i-paper bag le wayivula engazi ukuthi usezithezele olulenkume ngoba wahle wawela phansi wabangwa lezibi.
UMthunywa uzwe ukuba umuyi wabikela amalunga emuli yakhe ukuthi utshaywe yinyoni eyayiphakathi kwephepha leli.
UMthunywa uxhumane loNkosazana Juliet Nkomo oyisihlobo sikaSikhosana wathi wayekhona mhla kusenzakala amashwa la njalo kwamangalisa kakhulu ukubona i-paper bag “ihamba” emoyeni.
“Mina ngangikhona mhla kusenzakala isimanga lesi njalo kangilamathe ngengakubonayo. Sathi sihlezi labantwana phandle sezwa izinja zikhonkotha esangweni sabona kuqhamuka i-paper bag emnyama kungani ithwelwe ngumuntu igcwele kodwa kungakhanyi ukuthi igcweleni yaze yayangena endlini kamalume.
“Kuthe kunjalo umalume waqonda endlini samlandela wathi eyivula i-paper bag le wahle wawela phansi wahlanza udenda. Iphepha bheki le yayigcwele inhlanyelo yomumbu elependa eluhlaza.
“Umalume yena ngalesosikhathi wahle wehluleka ukukhuluma waze wayakhuluma sekubaphurofethi,” kulandisa uNkszn Nkomo.
UMnumzana David Sikhosana ongumnewabo kamuyi uthe udabukile ngoba umnawakhe bamtshayise ngezinto ngoba bembangisa ukuthi ubelima kakhulu.
“Abantu balapha bagangile njalo balomhawu yikho bebulele umnawami. Ngizwa ubuhlungu kakhulu ngokufa kwakhe ngoba bambulele bembangisa ukuthi ubelima kakhulu yikho beze bamthumela i-paper bag yenhlanyelo.
Okwakhathesi ngeke ngikhulume okunengi ngoba ngisathithibele ngesehlakalo lesi esisehleleyo njengemuli kodwa siyamazi umuntu ombuleleyo,” kutsho uMnu Sikhosana.
Usobhuku wakule indawo uMnumzana Danisa Ncube ebuzwa ngale indaba uvumile ukuthi yenzakele wathi kalankani ngayo njalo kuyaqala ukwenzakala isimanga esinje.
“Kuliqiniso sibili ukuthi uSikhosana wathunyelwa i-paper bag yenhlanyelo wafa. Ngikhuluma nje lami ngayibona ngamehlo njalo kangilankani ngalesisiga esenzakala esigabeni sami. Ngeqiniso lokhe ngathwetshulwa yingwe kangikaze ngizwe indaba enjengale eyenzakala esigabeni sami kungathi yinganekwane,” kuphetha uMnu Ncube.
