uMthunywa
Insuku esiphila kizo sezehlukene lezayizolo. Ukudla kwendulo lakho akusaziwa, labantu abanye abasakuthandi.
Ngikhuluma nje lenkobe azisaziwa kodwa-ke abantu sebekufuna lokhu kudla, ngitsho phela inkobe. Lamuhla ngizakhuluma ngemphako yensuku zalamuhla. Imphako le idingwa ngabantu abasebenzayo abangenelisisyo ukubuyela ezindlini zabo ngezikhathi zokudla.
Imphako le ifunwa yizihambi, labantwana besiya esikolo.
Nanzelela kulula-ke ukwenza imphako-le kulezinsuku. Abanye abasayenzi ngoba zikhona izindawo lapha abangathenga khona iloba yini abayifunayo edliwayo. Kuyadula kodwa esizenzela khona kutshiphile njalo kumnandi.
Akesiziphekele khona sikholise.
Kuyini okungenza imphako yalamuhla
– Izinkwa
– Amabhanzi
– Amagwili
– Irayisi
– Imacaroni
– Imagarine kumbe ibutter
– Amathanga
– Ibeetroot
– Amakheroti
– Itshizi (cheese)
– Imayonesi
– Incezu zenyama yenkomo, eyenkukhu, eyembuzi, yengulube, yemvu, yenyamazana
– Amatamatisi
– Ihanyanisi
– Isaladi cream
– Ikhabitshi
– Ilethisi
– Izithelo
– Amaqanda enkukhu
– Amanzi
– Amanamunede
– Isawudo
– Ibhokisi lokufaka ukudla
– Ukhezo lokudlisa nxa ludingakala
– Imbhida eyehlukeneyo
– Ingqamu
– Ipepper
– Amahlamvu etiye, ibilebile
– Uchago
– Ifologwe zokuhlanganisa
– Umganu wegilasi
– Isibindi
– Imithikazana
– Amakhowa
– Isinkwa singenza imphako eminengi, singaba ngesithengiweyo sisikwe saba zincezu kumbe oziphekele sona.
Nanzi izindlela ezehlukeneyo:
1. Faka izincezu ezingu-4 ibutter, sika izincezu zamatamatisi uwafake ngaphakathi kwencezu ezimbili zesinkwa. Faka isawudo leminye imithikazana oyithandayo.
2. Khanzinga amaqanda uwafake phakathi kwencezu zesinkwa ezifakwe ibutter. Vuvuzela isawudo lepepper.
3. Pheka amakhowa uwafake phakathi kwencezu zesinkwa esifakwe ibutter. Vuvuzela isawudo ipepper lemithikazana.
4. Khanzinga isibindi usifake phakathi kwencezu zesinkwa esifakwe ibutter. Faka isawudo leminye imithikazana.
5. Pheka inyama yenkukhu, uyikhuphe amathambo ubusuyisika izincezu, faka lezincezu phakathi kwesinkwa esifakwe ibutter. Vuvuzela ipepper ibilebile lemithikazana oyithandayo.
6. Qoba iletisi uyifake phakathi kwencezu zesinkwa esifakwe ibutter.
7. Ungafaka njalo lencezu zamatamatisi.
8. Vuvuzela isawudo, ibilebile lemithikazana oyithandayo.
Lezi zindlela ezilutshwane zokwenza umphako wesinkwa.
Nanzelela lokhu: Isinkwa lesi singadliwa kunathwa itiye kumbe inamunede. Singathwalwa ngebhokisi le pulasitiki kumbe sigoqelwe ngepulasitiki.
