uMthunywa
Ncekwenhle Ncube
ZIKHUZA imihlola izakhamizi zeKusile eLower Gwelo ngaphansi komlisa uNyama ngemva kokuba esinye isakhamuzi sifelwe zimbuzi zaso zilandelana okucatshangelwa ukuthi zifakelwe itshefu.
Kubikwa sekufe imbuzi ezidlula ezinhlanu njalo ezinye zilokhe ziqhubeka zisifa.
Ukufa kwembuzi zikaMnumzana Megic Ndlovu kuqale ngoMvulo kuyonale iviki lapho athe evulela imbuzi zakhe emini ezine zaqala ukuqhatsha wahle waziqedisa.
Omunye umakhelwane kaMnu Ndlovu ongathandanga ukuqanjwa ngegama uthe bezwa sebebizwa ngumakhelwane ukuthi ezobabonisa isiga esibehleleyo.
Uchaze ukuthi bathola imbuzi ezimbili ziqhatsha angathi zidle umahamba ngendlwana bahle baziqedisa.
“Thina sabizwa nguNdlovu ukuthi sizombonisa umhlola owawumehlele. Sathi sifika sathola imbuzi ezimbili ziqhatsha. Kwakungathi zidle umahamba ngendlwana.
“Kodwa kuyasolisa ukuthi zazingadla isibungu lesi besezisifa zilandelana ngoba kwabuye kwafa ezinye ezintathu ngelanga elifanayo. Kungenzeka ukuthi ziqhubeke zisifa.
“Mina ngokubona kwami zifakelwe itshefu ukuthi zife. Kodwa noma kunjalo ngubani umuntu olesibindi sokwenza ulunya olunje ezinyamazaneni ezingelacala. Angithi nxa umuntu esilwa loMnu Ndlovu ngabe umlandile walwa laye hayi ukulwa lezifuyo,” kutsho umakhelwane lo.
Kubikwa ezinye imbuzi ezitholakale zifile bucwadlana lomuzi bezikhukhumele izisu. Bathe bezihlinza bathola ziqumeke amathumbu. Lokhu kutshengisa ukuthi kungabe ekhona ogangileyo wazifakela itshefu.
UMnu Ndlovu ubikele intatheli ukuthi kumzwise ubuhlungu ngezifuyo zakhe. Uthe uyamdinga umenzi walokhu ukuze amchazele ukuthi kungani eqonde izifuyo nxa elenkinga laye.
“Kuyafutha enhliziyweni yami. Umuntu nxa elenkinga lami ngabe uthethe izikhali zakhe wahlasela mina hatshi ukuqeda izifuyo zami zonke. Ngifisa ukumbona umenzi walokhu ukuze ngibone ukuthi ngumuntu mhlobo bani.
“Sesibikile kusobhuku udaba lolu silethemba izalungiswa njalo izigijimi zakhe zizasinceda ukuchwayisisa ngokubulele imbuzi zikaNdlovu,” kutsho uMnu Ndlovu.
