uMthunywa
Cornelius Luphahla
BAKHUZA umhlola abazali beNkayi ngemva kokuvela kwamavidiyo kuwhatsapp omunye umbalisikazi weNkayi Primary School encinda uluju lwemvelo lomunye umfundi okucatshangelwa ukuba ufunda esikolo esiseLupane.
Ukusabalaliswa kwevidiyo le kuqale ngeSonto kuyonale iviki lapho uNkosazana Monica Mwase (40) akhanya esotha umlilo wemvelo lomunye umfundi besendlini yakhe esikolo, uMthunywa uyakuveza lokhu.
Kuzwakale ukuthi amavidiyo la avezwe emphakathini ngumfundi lo ngemva kokuba umbalisi lo, abethandana laye eyale ukumbhadalela imali yokuthi kumnyaka ozayo aye eyunivesithi.
UMthunywa uxhumane lesinye isakhamuzi sakule indawo uNkosazana Belinda Moyo othe kalankani ngehlazo elenziwe ngumbalisi lo.
“Mina lokhu ngitshwaqe umzimba ngesiga esenziwe ngumbalisikazi lo esokuthandana lomfundi phezulu kwalokho omncane khatshana kakhulu kulaye yena engakaya. Khona isibindi sokuthatha amavidiyo sibili wasithatha ngaphi emdala.
“Okunye okungimangalisayo yikuthi uNkszn Mwase ungomunye wabo Anna ebandleni lethu leRoman Catholic Church ngakho usesehlise isithunzi njengamalunga ebandla.
“Lokhu kungithelela inhloni sibili noma ngihamba emphakathini ngoba sokungani sonke sigangile,” kutsho uNkszn Moyo.
Omunye umbalisi owake wafundisa kulesisikolo ongathandanga ukuvezwa ngegama uthe uNkszn Mwase besokulesikhathi eside besola ubudlelwano bakhe lomfundi lo.
“UNkszn Mwase besokulesikhathi eside simcabangela ukuthi kungabe kukhona akwenza lomfundi lo. Ngitsho ngoba kwakuthi nxa umfundi lo ebuyile ngakibo angene laye endlini yakhe okwesikhathi eside kwesinye isikhathi kuze kuyetshona ilanga engaphumanga.
“Lokhu kwakusimangalisa ukuthi uyabe esenzani lomntwana wesikolo okwesikhathi eside kangaka njengoba bengayisizo zihlobo. Yikho okwenza samcabangela okunengi,” kutsho umbalisi lo.
UMsekeli kaMqondisi wezemfundo esabelweni seMatabeleland North uMnumzana Jabulani Mpofu ebuzwa ngale indaba uthe kabakayizwa ngakho bazayihlolisisa.
“Indaba kambalisikazi weNkayi othandana lomntwana wesikolo kasikayizwa ngakho sisazoyihlolisisa ukuze siyilungisise,” kutsho uMnu Mpofu.
Imizamo yokukhulumisana loNkszn Mwase yehlule ngoba ucingo lwakhe lwalile ukungena njalo kuthiwa abantu kade bemthethisa ecingweni okucatshangelwa ukuthi yikho okudale ukuba atshintshe inombolo zikamakhalekhukhwini.
