uMthunywa
Johas Moyo
ABABONA ngempilakahle yezifuyo abeLivestock Production Department (LPD) sebexwayise abalimi bezifuyo ukuthi bangalimisi inkomo nxa izulu lisina njalo baziphe lesikhathi sokuphumula esaneleyo ngoba bengekela ukwenza lokhu balakho ukulahlekelwa yizifuyo zabo njalo bacine bengasalimanga.
ULivestock Production Officer esabelweni seMatabeleland North kunhlanganiso yeLPD, uMnumzana Cosmas Muzunde ubikele uMthunywa ukuthi abalimi bonke jikelele kumele baqakathekise impilakahle yezifuyo zabo ukuze bangalahlekelwa.
“Sikhuthaza abalimi ukuthi bengalimisi inkomo zabo izulu lisina ngoba lokhu kubangela ukuthi zisubuke intamo zibe lezikofo okulakho ukucina kubangela ukuthi umlimi acine ehlala amalanga ambalwa engabophi elinde ukuthi izilonda ziphole,” kuchasisa uMnu Muzunde.
Uqhubekele phambili eveza ukuba abalimi abanengi balahlekelwa yizifuyo ezinengi ngalesi isikhathi ngoba bazisebenzisa kakhulu njalo kabalandaba lesimo somumo womkhathi.
“Khathesi inkomo zisuka ekucubeni kungakho ezinengi zicina zisifa zihlaselwa yimikhuhlane etshiyeneyo ebangelwa ngabalimi bezama ukuphanga umdaka okwenza becine bezisebenzisa kakhulu belibala ukuthi inkomo zabo kazikaqini ngoba besezicubile ngenxa yokuswela ukudla kukanti njalo akukabi kunengi okwenza zicine zisifa.
“Abalimi kumele basebenzise inkomo okwesikhatshana nje esincane beziphe isikhathi sokuthi ziphumule njalo ziye emadlelweni masinya,” kutsho uMnu Muzunde.
Kusenjalo uMnu Muzunde uphinde njalo waxwayisa abalimi ukuthi baqaphele inyongo ezifunyweni zabo ngoba utshani busaqalisa ukumila kungakho inkomo kazikajayeli izinto eziluhlaza ngokunjalo kungenzeka ukuthi zibe lenyongo okwenza kudingakale ukuthi zidozwe.
“Sikhangelele ukuthi njengoba kuzaqalisa utshani obuncane inkomo kazisakwazi izinto eziluhlaza ngakho sikhuthaza abalimi ukuthi bazidoze inkomo zabo ukuthi bazivikele kanye lokuziqinisa.
“Ikhona njalo leminye imithi yesintu abalimi abangayisebenzisa kanye leyesiLungu. Lokho bangakwenza ngokuvakatshela odokotela bezifuyo eVeterianry Services ukuze babacebise,” kuphetha uMnu Muzunde.
